Madrid, 16 December : Spanish La Liga te, Real Madrid away match te Alaves ke 2–1 te harai dise. Itu jit pichete, FC Barcelona logot point gap 4 point te nami ahise.
Kylian Mbappe 24th minute te dangor run diya pichete top corner te goal mari scoring open korise. Half-time laga aage, Real keeper Thibaut Courtois Pablo Ibanez laga shot ke bhal save kori dise. Kintu 68th minute te Carlos Vicente Alaves babe equaliser dise — agey offside diya asil, pichete VAR decision overturn kori dise.
76th minute te Rodrygo goal mari Real Madrid ke lead wapas dise, Vinicius Jr laga bhal work pichete. Kintu goal diya pichete Rodrygo calf injury karone field chari dibo lagise.
Anepale, FC Barcelona home te Osasuna ke 2–0 te harai dise. Raphinha last 20 minute te duita goal mari. Prothom goal box bahar pora ahise, aru second goal time khotom hobole 4 minute baki close range pora dise.
Sevilla struggling Oviedo ke 4–0 te harai dise. 22nd minute bhitor te Akor Adams aru Djibril Sow goal mari match almost khotom kori dise. 51st minute te Batista Mendy individual goal dise, aru last minute te Chidera Ejuke final goal mari dise. Oviedo laga din aru beya hoise, kelemane David Carmo 82nd minute te red card paise. Pichete club announce korise ki coach Luis Carrion ke sack kori dise.
Celta season laga prothom home league jit paisey, Athletic Bilbao ke 2–0 te harai. Williot Swedberg 48th minute te aru Jones El-Abdellaoui 55th minute te goal mari dise. Athletic laga Nico Williams penalty marise, kintu save hoise.
Sunday din thaka Levante aru Villarreal laga match tu Valencia region te heavy rain laga red alert karone postpone kori dise.
Add Comment