Romanian COVID-19 Hospital te jui para 10 jun morishe

Bucharest: November 15, 2020.  Saturday din Romanian hospital te coronavirus bemari manuh ke elaj kori thaka te jui olaikena 10 jun morishe, koikena desh agency laga emergency situations (ISU) para janai thishe. Jui toh Piatra Neamt county hospital laga intensive care unit (ICU) te olaikena osor room te pheli jaishe. Etu jui toh kenika olaishe khobor thaka naoi, officials khan para koishe. Etu samai, 7 jun manuh be jokom paishe aro besi serious te ase, etu oper te doctor duty te thaka be samil thakishe. Prosecutors para jui ola laga khobor toh investigate koribo ase koishe. Health Minister Nelu Tataru para reporters logot koishe ke, 6 jun pachia bemari manuh khan ke COVID-19 hospital eastern Romanian city Iasi te loikena jaishe. Jokom kora doctor laga body toh 40% jui para julishe aro tai ke capital Bucharest hospital te loijaishe, Tataru para koishe. “future legislation te, public hospital sob toh health ministry para sabo,” Tataru para kotha besi nakoina janaishe. Local hospitals toh county councils khan para sai ase, keli koile sob toh health para saboli dhuk howa nemite. Tataru para koishe ke, Piatra Neamt hospital laga intensive care unite (ICU) toh alag  floor te kam kori thakaibo. Etu jui toh desh te sobse tangor 2015 saal te kowa beche thakishe, etu samai capital Bucharest te night club te jui olaikena 65 manuh morishe. Romania toh European Union pithor te healthcare laga saman toh besi purana hoishe, etu te 353,185 coronavirus bemari cases ase aro 8,813 manuh morikena ase. Saturday din dak Romania te COVID-19 bemari manuh 13,000 toh hospital te ase, etu oper te 1,172 manuh intensive care units (ICU) te ase koishe.