Roy Kapur Films para India laga first Chief Election Commissioner laga biopic announce kurisey

New Delhi, June 3 : Production banner Roy Kapur Films para Trickitainment Media logotey Monday din te koisey ki taikhan para India laga first Chief Election Commissioner Sukumar Sen laga life laga kahani te film produce kuribole laga rights paisey. Etu announcement tu 18^th general election laga vote ginti hobole thaka ek din ageyte ahisey. Vote counting tu Tuesday din te hobole asey. Sukumar Sent u ekta mathematician thakisey kun civil servant hoijaisey. Sen para 1952 te huwa Indian general election laga kaam te nazar rakhisey, kuntu tu India independent huwa picheyte etihas te first election thakisey. Roy Kapur Films laga malik Producer Siddharth Roy Kapur para koisey ki taikhan para Sen laga dilchasp kahani te jaan dhalibole laga moka pa tu taikhan nimitey somman laga kotha asey. Roy Kapur para ekta statement te koisey, “Political party khan kea lag alag symbol aro colour para pehchana laga system para loikina pora likha nathaka laga problem ke dur kuribole tak aro vote dhala manu khan ke dusra manu laga naam te thogaikina vote dhalibole naparibo nimitey fingernail te mitabole napara laga ink lagaidiya laga idea ana tak…Sukumar Sen para ana bisi idea khan ajitak bi cholai asey! Amikhan laga democratic process nimitey architecture dhalibole tai para contribute kora tu celebrate kuribole deserve korey. Aro amikhan para India aro duniya te audience(film sa manu ) khan ke amikhan laga sobsey first election aro etu laga picheyte thaka amazing manu laga dilchasp kahani dikhabole asey.” Sukumar Sen laga grandson(pota) Sanjiv Sen para etu film laga producer khan ke etu dangor desh laga zikar nukurikina thaka hero(Sukumar Sen) laga nokoikina thaka kahani ke dikhabole nimitey subhkamna disey.