Rs. 40 lakh Kohima chamala nemite dedese

KOHIMA, SEPTEMBER 11 : Kohima District Disaster Management Authority (DDMA) pora Rs. 40 lakh poisa toh Kohima chamala nemite motub karne dedese. Kele etu pora chamala te manu kan phasi kena thaka logot motub hobole karne koi kena.Monday din Media khobor kura kan ke kotha kurikena DC Kohima Rajesh Soundararajan pora 1,300 khor manu kan Kohima District laga kan ekdam biya pora phasai de kena thakise. Etubi August moina darek 29 dak nahua mousom huikena thaka pora. Aro etu chamala time te khor saman, kheti saman, gaas kan beejon nemite laka aro khor janwar kan sob ke diktar kuride kena thakise koise. Aro DC porabi etu SDRF kan hisabte 1 moina nemite etu chamala pora phasi kena thaka khor kan ke Rs. 5,000 dede kena ase koi kena janaise.Etu DC bi SDRF kan pora etu poisa diya toh khor manu kan neju saman kan ekdam biya hua kan ke hi diya laga ase koi kena janaise. Aro etu chamala nemite asul aro bhal te motub debole laga toh Central Sorkar pora saidebole ase koi kena janaise. Etu oporte tai bi etu nesena chamala time te mati kan toh norom thakibo. Etu karne khor kan banai kena thaka kan sob ekbar nemite banabole nakuribi koi kena husir janaide thakise.Tai bi etu chamala kan nemite District Administration kan pora thik pora saidebole kuri ase (survey in all affected areas) koi kena Media khobor kura kan ke janaise. Huilebi etu chamala kan nemite ulta public manu kan nahua kotha aro mesa kotha aro ulta kotha kan ulai ase koi kena janaise. Etu karne tai public manu kan kun etu nesena mesa kotha ulai etu kan ke thik pora husir laga kotha manabole kuribo koi kena janaise.