New Delhi, October 23 : Ahmedabad crime branch para Directorate of Revenue Intelligence (DRI) logotey milikina Maharashtra laga Chhatrapati Sambhajinagar para duijun manu ke drugs laga dhanda chola aro India laga bisi alag alag seher te aro ekdam alag aro dangor dangor manu khan laga party khan nimitey drugs supply kora nimitey arrest kurisey. Etu duijun arrest huwa manu majotey Surat laga ekjun chemical engineer bi thakisey. Tai laga naam tu Jitesh Hinhoria thakisey.
Etu team para Rs 500 crore opor laga drugs dhurisey.
Etu Chemical engineer, Jitesh Hinhoria aro poila laga ekjun pharma te kaam kora manu laga haath para 23000 litre laga chemical dhurisey kuntu ke ketamine, mephedrone aro cocaine nisna drugs khan banabole nimitey cholai.
Official khan para kuwa hisap te, Maharashtra laga Aurangabad district te thaka Paithan te thaka Mahalakshmi Industries koikina ekta factory tu dimag ke olta polta kuridiya saman Mephedrone aro Ketamine bana te shamil thakisey. Ahmedabad crime branch aro Directorate of Revenue Intelligence (DRI) para milikina talashi kora picheyte, utu jaga para pura puri 4.5 kg laga Mephedrone, 4.3kg laga Ketamine aro 9.3kg Mephedrone laga mixture paisey. Etu narcotic drugs aro kaccha chemical laga illegal market te Rs 500 crore opor value asey.
Gujarat police, DCP Crime Branch, Chaitanya Mandlik para koisey, “ Amikhan logotey enaka jankari ahisey ki Surat seher para ekjun manu kun etya Aurangabad te thaki asey tai tu narcotics racket cholai asey. DRI Ahmedabad Zonal Unit aro Crime Branch para khufiya jankari diya picheyte DRI para Friday din te Narcotics Drugs and Psychotropic Substances (NDPS) Act laga under te Chhatrapati Sambhajinagar laga bisi alag alag jaga khan te talashi loisey.”
Etu opor te, ekjun doshi laga ghor te talashi kora homoitey 23 kg cocaine, 2.9 kg Mephedrone aro Rs 30 lakh laga cash paisey.
Reports hisap te, Hinhoria tu ek saal adha para narcotics produce kora laga business te shamil thakisey. Tai para Chhatrapati Sambhajinagar te bi tailaga underground operation khara kurisey.
Etu engineer para Mumbai te cocaine supply kuri thakisey aro Ratlam, Indore, Delhi, Chennai aro Surat te alag drugs supply kuri thakisey.
Add Comment