Dimapur, 11 August: Ruling People’s Democratic Alliance (PDA) koise, Centre para Article 371(A) nahatabole wada kora nemide Naga peace talks aro negotiations toh sitha rasta deh ase koikena biswaas bonaise.
Saturday din PDA chairman Chingwang Konyak aro co-chairman Temjen Imna Along para Prime Minister Narendra Modi aro Union home minister Amit Shah ke kushi janaishe. Kelay koile Constitution laga Art 371(A) deh nachobole janaideya nemide.
Nagaland governor R.N. Ravi para be Article 371(A) toh Nagaland laga manu nemide ekala aro sacred commitment ase koikena janaideya ke kushi paise. Ravi koise, government of India toh phal para kaam kori thakise etu para ektum advanced stage deh thaga ongoing political process toh kothom hobole ase.
PDA koise, peace talks deh pura shaat toh debo kelay koile Naga manu samai rokhi thaga toh jani kena phal para joldi manibo nemide.
Wednesday deh BJP Legislature Party leader and deputy chief minister Y. Patton aro Along para Modi and Shah aro NDA partners deh ektum kushi powah janaishe. Kelay koile Jammu and Kashmir ke Article 370 aro Article 35 (A) dekena thaga toh hatai debole fesla kora nemide.
Tuita leaders koise, Jammu and Kashmir nemide special constitutional provisions hataideya toh Jammu aro Ladakh nemide spirit aro aspirations othise. Etu para Kashmir Valley deh all round development aro progress nemide rasta khulishe.
Tai khan koise, Jammu and Kashmir laga situation aro Nagaland toh pura-puri alak ase. Tai khan para kebah kebi situation deh Nagaland BJP toh Nagas khan logode ekta hoi kena thakibo aro Naga manu laga regional aspirations toh realise koribo koise.
Add Comment