Kyiv, Ukraine, 05 April 2025: Russian ballistic missile Ukraine laga President Volodymyr Zelenskyy laga ghor thaka city, Kryvyi Rig te mari she, junte 18 jon manu muri jai she, juntu majot 9 ta bacha ase, authorities khan koise.
Dnipropetrovsk region laga Governor Sergiy Lysak Saturday (April 5, 2025) te koise, emergency operation khotom hua pichete, 61 jon manu injure hoise.
Missile tu Friday (April 4) te ekta residential area te mari dise, bacha khan laga playground laga osor, etu Kryvyi Rig military administration laga head Oleksandr Vilkul koise.
Social media te unverified video khan dekhaise ki dwad body khan road te thaka, aru ekta video te smoke uthi thaka dekhaise evening sky te.
Dusra video te ekta gari juli thaka dekhaise aru manu khan chilai thaka awaz bi hunishe.
“18… etu he number ase juntu Russian missile strike te Kryvyi Rig te muri jai she. Etu majot 9 to bacha khan ase,” Lysak Telegram te koise.
Tai koise Friday laga attack te 12 to bacha khan bhi injured hoise.
“Etu dukh ase juntu nijor worst enemy ke bhi moi na dibo,” Lysak koise.
Russia laga defence ministry koise ki tai khan “precision strike with high-explosive missile” ekta restaurant te mari dise, “juntu te western instructor aru military commander khan meeting loi thakishe.”
Saturday te Russia koise ki tai laga air defence unit khan 49 Ukrainian drone rati te destroy kuri se.
US President Donald Trump, juntu nai office loise, war khotom kuribo karone bisi pressure dei ase, kintu Trump administration ceasefire arrange kuribo na pari kena ase, hoile bhi duita side logot kotha kuri ase.
Zelenskyy koise ki missile attack dikhai dise ki Russia ceasefire kuribo mon nai.
“Etu ekta he karon ase juntu karone war choli thake — Russia ceasefire na kuribo, aru ami etu dekhi ase. Pura duniya bhi dekhi ase,” tai koise.
Russian President Vladimir Putin March te US aru Ukraine laga joint proposal for full ceasefire ke reject kuri dise, aru Black Sea truce karone US sanctions uthai dibo lagibo, etu demand kuri ase Kremlin.
US Secretary of State Marco Rubio Friday te koise Trump “endless negotiation” laga trap te na phasibo Russia logot.
“Amikhan etya few weeks te janibo, ki Russia shanti karone serious ase nai,” tai koise.
Zelenskyy evening address te Russia ke accuse kuri se ki “diplomacy” to Russia karone ekta “empty word” hoise.
“Ceasefire already hoijabo parise, kintu Putin etu reject kurise,” tai koise.
Kryvyi Rig, juntu Ukraine laga Dnipropetrovsk region te ase, frontline para 60 kilometre dur te ase, aru regular Russian drone aru missile attack face kuri thake.
Zelenskyy etu industrial city te jonom hoishe, aru pre-war population around 600,000 thake.
Andriy Kovalenko, Ukrainian disinformation fight kuribo karone official, koise ki Kryvyi Rig te juntu missile use kuri ase etu “Iskander” ase.
Iskander hoile ekta Russian ballistic missile system ase, juntu range up to 500 kilometre (311 miles) thake.
“Etu ekta intentional strike ase, bisi manu ke murabo karone,” Kovalenko koise.
Ekta alag drone attack te Kryvyi Rig te, Lysak koise ki ekta 56 saal manu laga wife muri jai she aru 7 jon injure hoise.
Add Comment