Salman Khan para free para HIV patient laga role kuribole manisey jitya pura Bollywood para mana kuridisiley

New Delhi, September 10 : Salman Khan para tailaga film career te alag alag tarika laga film te act kurisey. Tai tu tailaga commercial film nimitey jana jai, hoilebi tai actor-filmmaker Revathy para direct kora ‘Phir Milenge’ koikina ekta film te ekta HIV AIDS patient laga role bi kurisey. Etu film laga producer Shailendra Singh para tailaga instagram handle te ekta video post kurisey kotey tai para koisey Salman Khan para kinaka HIV AIDS laga opor te bana film tu free para kuridisey jitya pura Bollywood para etu te kaam kuribole mana kuridisiley. Etu video te Shailendra ke etu koithaka hunisey, “Salman Khan para etu film nimitey Rs 1 charge kurisey aro etu film laga last fale tai murijai. Amikhan ke pura India, khas kurikina youth  nimitey AIDS laga topic te jagrookta feilabole lagisey…Hoilebi ami para akhirkar etu realise kurisey ki cinema tu samaj laga ekta aina asey. Aro sob Indian manu laga dharkan asey. Utu homoitey aro etya tak bi Bollywood te sobsey dangor youth icon  tu Salman Khan asey. Hoilebi bhabna kuri sabi, Salman Khan ke AIDS laga bari te bana film te kaam kuribole convince kora(mana) jaabki tai tu asol te India laga Rambo, Terminator aro Superman asey.” Film producer Shailendra Singh para koisey, “Etu film laga lead actor tu HIV paikina last scene te murijai. Lead actor laga kahani tu etu asey. Bollywood laga pura industry para etu role kuribole mana kuridisey. Aro utu din tea mi para Salman Khan ke call kurisey. HIV laga last scene te Salman Khan morey, hoi tailaga fan khan tu khusi thaka nai. Hoilebi etu film laga message tu pura desh te pungchisey.” Salman Khan ke akhri bar ‘Tiger 3’ te dikhisiley. Kuntu ke Maneesh Sharma para direct kurisey.