New Delhi, March 21: Comedian aro You Tuber Samay Raina para announce kurisey ki tailaga bisi homoi para intazar thaka India tour tu post-pone kuridibo koikina announce kurisey. Aro etu para fan khan ke mondukh kuridisey hoilebi taikhan bujidisey. Etu kadam tu tai para tailaga comedy show ‘India’s Got Latent’ logotey jurikina thaka kanooni jhamila chulithaka majotey uthaisey. Kuntu para social media
Instagram laga ekta story te, Samay raina para enaka likhisey, “Hello guys, ami para amilaga India tour ke postpone kuri asey. Apnikhan sob para joldi refund pabo, apnikhan ke joldi lok kuribo.”
Samay Raina laga comedy show ‘Unfiltered’ kuntu toh olop din ageyte Delhi laga Talkatora Stadium te hobole thakisey etu show tu India’s Got Latent laga jhamila chulithaka majotey cancel hoijiasey. Samay Raina laga duita show bi cancel hobole ageyte bikri hoijaisiley.
Samay Raina tu tailaga India’s Got Latent laga ekta YouTube episode , kotey YouTuber Ranveer Allahbadia para hunibole letra thaka kotha koikina bisi manu ke gusa uthaidisey, etu laga jhamila te fasa picheyte tai laga mushkil homoi chuliasey. Etu episode laga video tu joldi viral hoijaisey aro pura desh te ekta debate olaidisey. Aro YouTubers Samay Raina, Ashish Chanchlani aro Ranveer Allahbadia laga against te hunibole bhal nathaka aro sabole bhal nathaka content promote kora nimitey ekta FIR file hoisey.
Maharashtra Cyber Police para etu mamla te etya investigate kuriasey aro etya tak 30 manu ke huda-hudi kuribole matikina asey.
Maharahtra Cyber Cell para Ashish Chanchlani aro Ranveer Allahbadia ke already huda-hudi kuriloisey. Hoilebi Raina para tailaga statement dibole baki asey.
Etu jhamila majotey, Raina para March 21 aro 23 te Delhi te hobole thaka show aro Gujarat te hobole thaka show khan bi cancel kuridisey. Tai tu YouTube para India’s Got Latent laga sob episode delete kuridisey.
Add Comment