New Delhi, June 2 : Actor Jaya Bhatia, kun para Sanjay Leela Bhansali laga Heeramandi te Phatto laga role play kurisiley tai tu etu show te thaka actor laga group laga ekta dangor aro jaruri hisa thakisey. Jayati para share kurisey ki etu series bana homoitey tai para Bhansali laga utu hisa dikhisey kuntu laga eman discussion huwanai. Aro koisey ki Bhansali tu tailaga actor khan ke hodai phujur khusi para lok korey. Tai para koisey ki manu khan para misa misi etu bhabna kuriloisey ki Bhansali tu hodai gusa te thakey, hoilebi etu hosa nohoi.
Jaya Bhatia para khusi para share kurikina koisey, “Tai tailaga actor khan ke bisi morom korey. Manu khan para taikey loikina aney misa misa enaka impression banaisey…hoilebi jitya ami phujur te jaikina taikey lok korey, tai amikey hug korey aro amilaga cheek(gaal) te kiss korey.” Tai para etu bi share kurisey ki jitya bi actor khan ekdam bhal shot diye Bhansali para taikhan ke Rs 500 diye. Aro Jaya tu Heeramandi laga shooting culi thaka homoitey etu moka tin-bar paisey Tai para kosiey, “Jitya apni bisi bhal shot diye tai para Rs 500 diye aro ami enaka tin-bar paisey. Ami Rs 1500 paisey. Jitya tai shot diya tu bisi bhal pai tai accha nokoi. Etu laga bodli tai ‘Jeeyo Phatto’ nohoile ‘500 rupay’ koi.”
Jitya Jayati ke tai para etu Rs 500 notes khan ke frame kurikina rakhisey naki koikina hudisey tai para koisey ki tai frame tu koranai hoilebi etu note khan ke suraksit para rakhi asey.
Ageyte, actor Indresh Malik kun Heeramandi show te Ustaadji laga role kurisiley tai para bi Bhansali ke loikina enaka ekey experience laga kotha koisey.
Add Comment