October 17, 2023 : Phase – I agitation lag part thaki kena, Sao Chang College laga students khan, itu Chang Wedoshi Setchang (Chang Students Conference) laga aegis under tey, protest march loishey, kala kapra lagai kena, Tuensang tey, Monday tey.
October 11th tey, CWS para announce kurishey tai khan laga decision toh, phase- I agitation shuru kuriboley laga, Tuensang laga Sao Chang College toh bond kuri di kena, October 12th para shuru kuri kena, tai khan laga demand toh fullfill nakuria tak. Itu demand khan toh hoiley – principal, teaching faculties, college bus allocate kuriboley laga, science laboratory upgrade kuriboley laga, deployment kuriboley karney.
Students khan Tower Clock tey para birai jaishey Deputy Commissioner laga office tak tey, placard dhuri kena, kunba placard khan tey toh “Tomorrow is too late”, “If you won’t listen, we will make you hear us”, “our future is created by what we do today, not tomorrow”, “we stand because we care” etc, khan likhi kena thaka laga dikhishey, koi asey.
CWS president – C. Pongsu Chang para Nagaland Post ke koishey ki, itu union toh hoiley lamba video conference loishey, department logotey, Monday tey, kuntu toh hoiley higher education laga commissioner aru secretary – Anenla T. Sato para chulai jaishey. Eneka thakilebi, tai para koishey, itu meeting toh hoiley tatey para khotom hoa nai aru-bhi.
Add Comment