KOHIMA, NOVEMBER 5 : Nagaland laga Apex Church Body kan pora Supreme Court laga kotha ke ekdam khilaf kurikena juwab dese. Etubi Homosexuality aro Adultery laga kotha jua-jua manaidiya toh Nagaland state te bi manibole lagi koi kena manaidiya ke. Etu ke Churches Body kan Nagaland laga pora etu toh Christians ami kan nemite ekdam thik nathaka laga ase koi kena juwab te janaide thakise.
Etu kotha Supreme Court pora manaidebole kura ke khilaf kura toh Nagaland Baptist Church Council (NBCC) kan October 30-31 te Executive Meeting mana time te mana laga ase aro ula laga ase koi kena tai kan Churches Body pora khobor te Saturday din janaise.
Church Body kan bi shathi kura toh (marriage) khali maiki aro moda nemite hi ase. Aro etu oporte moda-moda aro maiki-maiki toh kinika shathi kuribo. Etu toh ekdam thik nathaka laga ase koi kena janaise. Aro etu nesena adat aro neum toh Supreme Court pora kanoon hisabte manibole kuribi aro ami kan husa kebi kanoon hisabte thaka laga ase koilebi. Etu nesena Homosexual aro Adultery chis toh ekdam thik nathaka laga ase. Aro etu oporte ami kan Christian laga hisabte etu nesena kam toh najuli koi kena janaide thakise.
Etu karne Church Body pora ami kan Church manu kan etu nesena nahua kotha aro kanoon ke thik pora husir kurikena thakibole lagi aro etu nesena nahua chis pora ahtijabole kuribo lagi koi kena janaide thakise.
Add Comment