Seat belt lagai lobi

Nagaland Transport Secretary, Robert Longchari para etu kuwa tu hunibole bhal thakisey ki State Motor Vehicles Department tu aha 5 saal te, ‘Vision Zero: Zero Accidents, Zero Fatalities(accident para manu mora)’ hasil kuribole determined asey. September 20 te Nagaland laga stakeholders khan nimitey Irad/e-DAR (Integrated Road Accident Database/Electric Detailed Accident Report) laga opor te 2-day sensitization(aro bisi janaidibole laga) training  laga inaugural session te, Longchari para road safety laga gyan ke promote kora aro etu hisap te chola tu zinda thakibole nimitey lagiya any skill nisna jaruri asey. Aro koisey ki Nagaland state te road accident aro accident te manu mora tu bisi hoi asey. Hoilebi, tai para bhasan di thaka homoitey ekta kotha miss kurisey. Aro etu kotha tu accident te manu mora laga hatsa ke komti kuribole te seatbelt laga ahemiyat laga bari te thakisey. Nagaland te gari cholaisey koiley, driver khan seatbelt chola tu mushkil para dikhibo, khali bahar laga taxi/passenger bukha gari laga driver khan ke charikina. Juwa saal, tyohar laga season te, jitya Dimapur police para driver aro passenger khan nimitey seatbelt jaruri kuridisiley, amikhan para dikhisey ki jitya driver khan laga gari tu ekta traffic stop te pungchey nohoilebi checking hoi taikhan tu achanak para kapikina seatbelt lagabole bisarey. Seatbelt lagaikina etu driver khan tu traffic stop/checking ke paar kuribo hoilebi traffic police laga nazar para dur huwa logalog taikhan para seatbelt tu olaidiye aro eku nuhuwa nisna journey continue korey. Etya, etu chutu aro matlab nathaka laga harkat para ekta sawal uthai asey : Amikhan laga driver khan para kinimitey enaka jaruri safety(suraksa) measure ke eman halka para loi asey? Etu seatbelt tu khali ekta kapra laga tukra nohoilebi kanooni requirement ekla nohoi; etu tu ekta jaan-bachaidiya laga bustu asey. Duniyabhor para aha number para lagatar dikhaisey ki seatbelt pinda para accident laga homoitey murija nohoilebi serious jokhom kha laga risk ke ekdam komti kuridiye. Hoilebi, amikhan laga rajya te, seatbelt pinda tu nijor laga suraksa nimitey nohoikinafine khan para bachibole nimitey hey kora nisna asey. Traffic officer laga osor te pungcha homoitey tara tari seatbelt lagaikina fine terabole laga khatra para bachija logalog etu ke hataidiya para etu safety measure(suraksa laga kadam) laga asli maksat ki asey etu nubuja aro etu ke hisap nokora tu dikhai asey. Nagaland te seat belt pinda tu kinimitey khatra para bachibole nimitey jaruri precaution nohoikina ekta kaam nohoilebi fine terabole para bachibole laga rasta nisna sai? Etu tu najanikina thaka nimitey asey na safety measures(suraksa nimitey utha kadam) ke hisap nokora laga asey na eney ekta adat asey/ Etu mamla laga jar tu etu sob laga milaikina hobo. Amikhan laga jag ate road safety laga education(gyan diya) tu bisi komti asey. Aro bisi driver khan tu gari chola laga mechanics te olop maan hey training pai. Seatbelt, airbags nisna suraksa diya laga bustu laga ahemiyat aro gari speed para chola laga khatra te eman dhyan nidiye. Aro etu nimitey, driver khan para seatbelt pinda laga jaan-bacchabole para potential ke eman appreciate nokorey.  Amikhan para seatbelt safety  ke etu tu ekta option nohoikina jarurat thaka laga asey koikina kitya sabo? Amikhan laga rasta tu kitya enaka driver khan para bhorta hobo kun para seatbelt tu joborjosti nohoikina nijor marji para lagabo? Etu laga jawab tu education, enforcement(kanoon lagu kora) aro amikhan laga adat te astey para hoilebi regular bodli an ate pabo- enaka bodli kuntu, akha kuri asey ki, aro bisi manu laga jaan misa misi naja ageyte ahibo