Agencies, 3 September: Sunday din Serena Williams toh US Open quarter-finals de kushibolo parise. Tai Kaia Kanepi logode 6-0 4-6 6-3 pora jeti kena 24th career Grand Slam title nemide osor pongja thakise. First round de world number one Simona Halep toh hara de ektum ashrut howah thakise. 44th-ranked Kanepi pora be six-times US Open champion logode ektum dekthari deya thakise. Khel suru howah time de Williams toh ektum gara 6 points lowah thakise 18 minute majode. Second round de Williams pora tuita galdi kora karni kaia Kanepi 6-4 pora lead lowah thakise. Hoilebe third round de William aro gara hoija thakise. Taui Kaia Kanepi logode ektum aramse 6-3 pora lead lowah thakise. Quarter-final de William toh next seeded Czech Karolina Pliskova logode khelibole ase. Czech Karolina Pliskova toh Australian laga khelari 18th seed Ashleigh Barty logode 6-4 6-4 pora jeti kena quarter final de kusha laga ase.
Sloane Stephens jetise Elise Mertens logode
Sunday din tusara match de, Defending champion Sloane Stephens pora Belgian Elise Mertens logode 6-3 6-3 pora jeti kena quarter-final de kusha thakise. Etu sal Flushing Meadows jaga de Stephens toh jarta match debe na-hari thakise. Hoilebe tai jowah moina Cincinnati warm-up de Mertens logode hara thakise. Enaga hari kena thaga bechide be etu par Sunday din laga khel de dekthari pai kena thaga nai. Aro tai pora khel toh ek-khonda aro 26 minutes majode kothom korideya thakise. Stephens toh next quarter-final de against Latvian Anastasija Sevastova logode khelibole ase.
Add Comment