New Delhi, August 15 : Shah Rukh Khan para 2023 te bisi kamyabi dikhisey jitya tailaga sob 3ta film Pathaan, Jawan aro Dunki bi box office te bisi dangor hit hoisey. Etya, aro ekbar, tai tu tailaga release hobole thaka next film ‘King’ logotey fan khan laga excitement level barabole tayar asey. Tai para etu film laga bari te recently jankari disiley, kuntu te Sujoy Ghosh para direct kuribole asey. Ajikali Shah Rukh tu tailaga production chuli thaka action-drama nimitey tayari kuri asey, kotey tai ekta gangster laga role kuri asey. Variety logotey kora ekta interview te, Shah Rukh Khan para koisey ki Sujoy Ghosh laga ‘King’ tu ekta bisi entertain kuridiya emotional film hobole asey.
Jitya Shah Rukh ke tailaga next film laga bari te hudisiley, tai para etu film laga naam reveal kurikina enaka koisey, “Etu tu ‘King’ koikina ekta film asey, kuntu ke Sujoy Ghosh(Kahaani) para direct kurisey aro Siddharth Anand kun para Pathaan banaisey tai para produce kuri asey. Etu tu ekta action drama asey; etu tu ekta Hindi film asey. Etu interesting hobole asey. Ami bisi homoi para enaka film kuribole monjai thakisey, aro ami enaka film 7-8 years para eman kuribole monjai thakisey. Amikhan ke eney enaka lagisey ki Sujoy tu etu film nimitey right choice hobo kilemaney amikhan para etu film ke bisi emotionally correct hobole dibole mon thakisey. Amikhan sob ekta cool, massy, action, emotional film banabole nimitey eksath ahi asey.”
Etu film te Shah Rukh ke tailaga chukri Suhana Khan logotey dikhibole asey. Etu film te Abhishek Bachchan ke bi ekta dangor role te dikhibole asey.
Add Comment