Shah Rukh Khan, Rajkumar Hirani aro Samantha Ruth Prabhu nutun film kuribole thakiya laga khobor misa asey koisey

New Delhi, June 24 : Shah Rukh Khan aro Rajkumar Hirani tu juwa saal Dunki film nimitey haath milaisiley. Etu film tu audience khan laga taraf para bhal response paisey. Etu film release huwa picheyte enaka akhwa(hosa asey na nai najanikina thaka khobor) chuli thakisey ki taikhan duijun tu Samantha Ruth Prabhu logotey ekta nutun film te aro ekbar eksath kaam kuribole asey. Hoilebi, Rajkumar Hirani logotey close thaka ekta source para etu nutun film logotey jurikina thaka sob khobor tu misa asey koisey. Ekta latest khobor aha te, Rajkumar Hirani logotey close thaka ekjun manu para Rajkunar Hirani, Shah Rukh Khan aro Samantha Ruth Prabhu tu ekta nutun film nimitey ek sath aha laga  khobor khan tu misa asey koisey. Agey barikina etu khobor te enaka koisiley ki South actress Samnatha tu etu film te Shah Rukh Khan logotey romance kuribole asey. Hoilebi etu source(jankari diya manu) para sob khobor ke galat thehraikina koisey ki Rajkunar Hirani tu etya tailaga next film likha te busy asey. Etu opor te, nahi Shah Rukh Khan aro nahi Samnatha logotey eku film ke loikina discussion hoisey. Etu manu para Shah Rukh Khan aro Samnatha ekta naam nathaka desh bhakti film nimitey eksath kaam kuribole thaka laga bhabna te hasi disey aro etu tu ekdam matlab nathaka aro misa asey koisey. Dunki film release huwa picheyte Rajkumar Hirani para Pinkvilla logotey kora ekta exclusive baat-chit te Shah Rukh Khan logotey dusra film nimitey ahibole homoitey milikina kaam kuribole laga possibility janaisiley.