Shah Rukh Khan tu 77th Locarno Film Festival te Pardo alla Carriera award pabole asey

New Delhi, July 02 : India te ‘King Khan’ koikina mashoor huwa Bollywood superstar Shah Rukh Khan laga cap(topi) te aro ekta pankh add hoisey. Saturday(August 10) te Italy laga Piazza Grande te hobole thaka  77^th Locarno Film Festival te, Shah Rukh Khan tu izzadar Pardo alla Carriera Ascona-Locarno Tourism award pabole asey. Etu festival te Shah Rukh Khan laga film career para ekta sobsey jaruri aro khas film ‘Devdas’ dikhabole asey kuntu tu 2002 te release hoisiley. Etu film ke Sanjay Leela Bhasali para banaisey. Aro Shah Rukh Khan tu August 11 te Forum Spazio Cinema te public logotey baat-chit kuribole mojud thakibole asey. Shah Rukh Khan laga bisi film ke duniyabhor te manu khan para khusi pai. Aro etu film khan para tailaga naam ke duniyabhor te film sa manu khan majotey mashoor banaidisey. Aro tai para duniyabhor te bisi alag alag dangor film festival khan te tailaga desh (India) aro tailaga film khan ke represent kuribole moka paisey. 2007 te tai Ordre des Arts et des Lettres award paisiley. Aro 2014 te French government para taikey Legion d’honneur award disey. Shah Rukh Khan laga recently 2023 te 3ta film release hoisiley. Aro etu 3ta film tu Pathaan, Jawan aro Dunki asey. Aro etu 3ta film bi bisi poisa kamaisey aro duniyabhor te film sa manu khan bisi khusi paisey. Jawan film tu Shah Rukh Khan nijor laga production house, Red Chillies Entertainment para produce kora laga thakisey aro etu film tu etihas laga kitab te  etya tak laga sobsey bisi poisa kama Hindi film hoikina gusisey.