New Delhi, January 11: Shiv Sena (Uddhav Balasaheb Thackery) leader Sanjay Raut para Saturday te announce kurisey ki Maharashtra te hobole thaka Mumbai aro Nagpur municipal corporation election khan te, tailaga party tu ekla participate kuribole asey.
Rajya Sabha MP aro Uddhav Thackery-headed Sena (UBT) laga senior member, Sanjay Raut para etu bayan tu enaka homoitey asey jitya Congress, Shiv Sena (UBT) aro NCP(SCP) majotey jhamila ola laga sign dikhi asey.
Raut para Mumbai te reporters khan ke koisey, “Amikhan nijor para fight kuribo, ki hoilebi hoboledibi. Amikhan nijor nimitey sabo lagey. Uddhav Thackeray para amikhan ke ekta signal disey.” Tai para koisey ki tai etu mamla tu Pramod Manmode logotey discuss kurisey, kun Shiv Sena (UBT) laga Nagpur unit laga chief asey.
Raut para etu bi koisey ki Congress aro NCP(SCP) logotey alliance te thaka nimitey workers khan election te contest kuribole chance napa nimitey party laga growth te affect hoisey. Agey barikina, etu senior politician para koisey ki INDIA group tu 2024 Lok Sabha election nimitey hey thakisey. Etu ekey kotha tu Rashtriya Janata Dal leader aro Bihar laga poila laga deputy chief minister Tejashwi Yadav para olop din ageyte koisiley.
Raut para koisey, “Lok Sabha election picheyte, INDIA bloc laga ekta meeting bi rakhanai. Etu meeting rakha laga zimidar tu Congress laga thakisey.”
Lok Sabha election, kuntu te Bharatiya Janata Party laga National Democratic Alliance(NDA) para lagatar 3rd baar jitisey, INDIA bloc tu BJP ke Lok Sabha te ekta simple majority nidibole kamyab hoisey. BJP tu taikhan laga alliance NDA laga support para government form kurisey.
Hoilebi, Congress para Haryana te BJP logotey harija aro Maharashtra te Maha Vikas Aghadi (Congress, Sena- UBT aro NCP-SP) tu NDA laga khilaf te harija para Congress, Sena- UBT aro NCP-SP majotey darar anidisey.
Add Comment