Sikkim Assembly election 2024: 12 maiki candidate maidan te

Gangtok, April 05 : Sikkim Assembly aro Sikkim laga ekta Lok Sabha seat nimitey maidan te thaka 146 nominee majotey khali 12 maiki candidate asey. Jabki etu rajya laga 50% maan voter tu maiki asey. 

Sikkim te 32 Assembly seat aro ekta Lok Sabha constituency asey. Assembly aro Lok Sabha seat laga voting tu April 19 te hobole asey.

Sikkim te, total 4.66 lakh voter asey kuntu majotey 2.31 lakh tu maiki khan asey.

Outgoing Sikkim Legislative Assembly (SLA) te, 3jun maiki MLA-  Melli para Farwanti Tamang, Rangang para Rajkumari Thapa aro Zoom-Salghari (SC) para Sunita Gajmer thakisey. 

Juwa bar laga state Assembly aro Lok Sabha election te, 15 maiki candidate thakisey. 

Ruling Sikkim Krantikari Morcha (SKM) para 4jun maiki candidate ke field kurisey. 2019 election te, etu party para 3jun maiki candidate ke field kurisiley. 

Etu maiki SKM candidate khan majotey CM Prem Singh Tamang laga maiki Krishna Kumar Rai bi asey. Tai tu Namchi-Singhithang para election laribole asey. Aro sitting MLA Rajkumari Thapa, kun para olop din ageyte BJP charikina SKM join kurisey taikey Rangang-Yangang para field kurisey.

SKM para BJP president aro sitting MLA D R Thapa laga khilaf te Kalawati Rai ke field kurisey, jabki Pamin Lepcha tu Gnathang-Machong (BL) para contest kuri asey. 

Aro ekta regional outfit, Citizen Action Party (CAP-Sikkim) para bi 4jun maiki candidate ke field kurisey, jabki BJP aro Congress para duijun maiki candidate ke ekta ekta ticket disey. 

Etu leading opposition party, Sikkim Democratic Front (SDF) para etu bar election te ekjun maiki candidate ke bi field koranai. SDF para 2019 laga election te, 4jun maiki candidate te ticket disey aro etu majotey duijun para election jitisey.

SDF laga ekjun representative ke bi comments nimitey contact koranai ki kinimitey etu party para etu bar ekjun maiki candidate ke bi field koranai. 

Sikkim laga ekta single Lok Sabha constituency te kotey 14 candidate lari asey, Bina Rai koikina ekjun maiki tu ekta independent candidate hoikina contest kuri asey. 

Lok Sabha(1991-96) te Sikkim ke represent kora akhri maiki candidate tu Dil Kumari Bhandari thakisey.