Sikkim para 4 years opor kaam kora sob sarkari employee ke regular

Gangtok, February 04 : February 4 te Sikkim Krantikari Morcha (SKM) Party laga 12^th Foundation Day laga jashan mana homoitey bhasan dikina, etu party laga President aro Sikkim laga Chief Minister Prem Singh Tamang para Sikkim manu khan laga jibon ke bodli kuridibole thaka laga bisi alag alag scheme announce kurisey. 

Jama huwa bhir khan ke bhasan dikina, Tamang para bisi alag alag jaruri initiative khan janaisey kuntu para Sikkim laga future ke bodli kuridibo. Tamang para biswas dilaisey ki 4 years para bisi kaam kora sarkari employee khan laga contract ke regular kuridibo aro non-gazetted sarkari employee khan ke bi  etu wada kurisey.

Tamang para dangor Creatorpreneurship Scheme announce kurisey. Etu scheme te social media(instagram, Youtube, X) khan te video, reels aro blog khan bana 75,000 youth khan ke Rs 5 lakh para Rs 10 lakh tak poisa laga modod dibole aim kuri asey. Etu kimat tu ekjun manu laga social media te kiman following asey nohoilebi kiman manu para taikey follow korey etu hisap te dibole asey.

Aama Yojna laga under te, 64,000 manu khan faida pabole asey. Aro sob ama khan para LPG refill kuribole nimitey saal te Rs 4,400 poisa pabole asey. Etu opor te, Sikkim Certification thaka driver khan tu Rs 10 lakh tak laga insurance pabole asey. 

Chief Minister para graduation tak Chief Minister Merit Scholarship (CMMS) baraidibole bi announce kurisey. Aro enaka kurikina Class XII picheyte bi pora likha te support dibole asey.

Tamang para Sikkim Garib Awas Yojana under te 300 ghor banabole laga plan bi janaisey. Aro enaka kurikina ghor nathaka manu khan ke ghor dibole asey.

Gorib ama khan ke support kuribole laga kadam utha te, Aama Sashaktikaran Yojana para saal te 64,000 opor ama khan ke poisa laga modod dibole kosom khai asey.

Baccha napaikina thaka mota-maiki ke support kuribole nimitey, Tamang para Vatsalaya Scheme announce kurisey kuntu te In Vitro Fertilization (IVF) treatment kuribole nimitey poisa laga modod dibole asey.

Nutun business suru kuribole hosla baraikina, SKM laga sarkar para ‘One Family, One Entrepreneur Yojana’ introduce kurisey.