Sonakshi Sinha June 23 te Zaheer Iqbal logotey shaddi kuribole

New Delhi, June 10 : Sonakshi Sinha aro Zaheer Iqbal tu bisi homoi para relationship te thakisey hoilebi kitya bi etu kotha public te admit koranai. Taikhan duijun tu etya taikhan laga relationship ke next level te loijabole asey. Taikhan duijun tu June 23 te ekta private aro intimate ceremony te shaddi kuribole asey. Taikhan laga shaddi laga theme tu ekta magazine cover laga hobole asey kuntu te ‘Rumors are true’ message likhikina thakibole asey. Netflix aro Sanjay Leela Bhansali laga Heeramandi show laga pura cast tu etu shaddi te mojud thakibole asey. Sonakshi para Heeramandi: The Diamond Bazaar show te Rehaana aro Fareedan laga double role kora nimitey bhal review pa para utu homoi laga yaad dilaisey jitya tailaga ekta film bi aro solo project jaiseki Akira, Noor, Happy Phirr Bhag Jayegi aro Khandaani Shafakhana khan kamyab huwanai. Sonakshi para koisey ki tai enaka mushkil homoi para gujra laga bawajut bi tai nijor ke loikina bisi confident thakisey. Tai para koisey, “Hoilebi ami para etu bi jani thakisey ki ekta film laga box office te natija ola tu amilaga control te nai. Ekta actor hoikina, apni ke apni laga best dibo lagey. Amilaga performance ke hodai appreciate kurisey. Aro enaka kurikina ami agey barisey aro ami para kuribole mon thaka kaam khan kuri thakisey. Etu laga phal tu etya pai asey. Sob manu bi mushkil homoi para gujrey.”Sonakshi tu etya tailaga career laga best phase te asey koikina janaikina koisey, “Ami tu akhirkar enaka role kuri asey kuntu ami kuribole rukhi thakisey- enaka roles kuntu ek-dusra para ekdam alag asey. Ami nijor bisi enjoy kuri asey.  Amilaga bhabna te etu tu actor hobole laga bisi bhal homoi asey aro ami etu homoi laga pura istamal kuri asey.”