New Delhi, 5 May : National Award paise thaka playback singer Sonu Nigam ekta notun jhamela te dhuki jaise jabolekaran Bengaluru te hobo kora ekta concert laga video viral hoise. Video te dekhaise ki actor stage pora ekjon Bengaluru fan ke lesson di ase, juntu fan ta rude hoi koi dise ki Sonu Kannada te gana gabo lage, onno language te nohoi. Stage pora Sonu etu incident te reaction di, Pahalgam terrorist attack logot compare kori dise, aru etu karone aru ekta notun jhamela shuru korisey.
Video viral hoar pisot, actor ke social media te anek manu troll kori thakise, aru Bengaluru District Police bhi singer ke ekta hafta bhitor te notice dise. KRV laga complaint upor te Sonu Nigam logot FIR register korisey Avlahalli Police Station, Bengaluru Rural District te. Kintu etiya sob hoar pisot, Padma Shri paise thaka singer Sonu Nigam nijor side pora react kori dise.
Sonu laga note te likha ase:
“Namaskara, moi language, culture, music, musician, state aru manu khan ke khali Karnataka te thaka time nohoi, duniya te jiman jagah jao totu bhi bhalpowa disu. Moi nijor Kannada songs ke onno language laga songs logot compare korile, etu khan ke beshi respect aru bhalpowa disu — Hindi songs logot bhi. Social media te hajar hajar video ase etu laga proof hisab te. Moi jitu concert Karnataka te hobo, etu karone moi ek gonta pora beshi Kannada songs prepare kori thakisey.”
Add Comment