South Korea laga President Yoon Suk Yeol ke jail para release kuridisey

South Korea, March 08: South Korea laga iljam lagikina thaka President Yoon Suk Yeol tu ekta court para tailaga arrest ke cancel kuridiya picheyte Saturday te jail para release hoisey. Etya tai tu tai court laga trial nimitey jail laga bahar

Yoon tu December 3 te tai civilian rule ke paltabole kosis kora nimitey insurrection(matlab government nohoilebi authority laga khilaf te utha laga) iljam te etu saal laga January moina te arrest hoisiley. Tai tu detention centre para smile kurikina aro tai nimitey cheer kurithaka bhir ke bow-down(jhukikina) bahar olaisey. 

Tailaga lawyer khan para release kora ekta statement hisap te, Yoon para tailaga supporter khan ke dhanyabad janaisey. AFP para report kora hisap te tai enaka koisey, “Ami etu desh laga manu khan ke dhanyabad dikina amilaga matha nichey jhukai asey.”

Friday din te, Seoul central district court para etu koikina tailaga arrest warrant cancel kuridisey ki taikey dhurikina rakha tu prosecutor(tailaga khilaf te case lara wakil) khan para taikey charge kuribole ageyte legal period(kanoon para dikina thaka homoi) tu paar hoijaisey. 

Etu investigation tu kanoon his ate hoi asey na nai etu ke clarify kuribole aro sob doubt hataidibole nimitey, court para tailaga detention(arrest kurikina rakha) tu cancel kuridiya toh thik hobo koikina faisla kurisey. 

Hoilebi prosecutor khan para etu faisla ke criticize kurikina etu tu thik nai koisey, holebi last te appeal nukuribole decide kurisey. 

Etu prosecutor khan para koisey ki taikhan tu etya etu case ke trial court laga ageyte present kuribole te focus kuribo. 

Yoon ke January 15 te custody te loijaisiley, tai dui hapta maan arrest hobole para bachithaka picheyte. Tai para martial law( matlab desh ke military para cholabole) laga declaration, kuntu para olop homoi nimitey civilian rule(aam manu para desh ke chola) ke hataidisiley aro kuntu te National Assembly te military khan ke dhalidiya dikhisey, etu ke lawmakers(kanoon bana manu khan) para olop ghonta bhitor te cancel kuridisey. Aro picheyte December 14 te tailaga khilaf te case lagaisey. 

Tai tu etya ekta Constitutional Court laga ekta decision face kuribole asey. Etu decision tu taikey President post para formally hataidibo na nai etu laga bari te hobole asey. Judi etu court para tailaga opor te iljam lagikina thaka tu thik asey koikina manisey koiley, South Korea tu 60 days bhitor te ekta nutun presidential election rakhibole lagibo. 

Opposition leader khan para Yoon ke release kuridiya tu kara para condemn kurisey.