Sri Lanka 2 town te notun cases nemite curfew hoishe

Colombo: October 5, 2020. Sunday din te Colombo laga Divulapitiya aro Minwangoda town te COVID-19 positive thura nemite  curfew lakai thishe, koikena Army Commander aro COVID-19 prevention task force laga head, Shavendra Silva para janai thishe. Tai koishe ke, Divulapitiya chaka te maiki ek jun apparel factory te kam kora ke coronavirus positive paishe aro tai ke  Gampaha hospital te admitted korishe. Tai logot positive thura nemite, 50 manuh neshina kaun khan etu chaka te kam kori thakishe home quarantine te korishe koishe. Officials khan hesab te koishe ke, April moina beche te, etu first COVID-19 community case thura ase. Olop din agae te paa khan toh foreign chaka para aha manuh khan thakishe. Sri Lankan government para June 28 darik te curfew thaka toh uthaishe, tai khan chaka te tui(2) moina oper notun cases natha nemite ase koishe. Hoilebi, International Flights khan toh aro nakoli-kena ase. Island nation toh March 20 darik para lockdown te thakishe, hoilebi olop din thaka beche pura-puri lockdown toh hataishe. Government para office aro business toh May moina te kuliboli hokom thishe. Etu beche June moina te public transport khan be restriction toh hatai thishe. Etu beche aro government para COVID-19 curfew 11 pm para 4 am dak thaka toh , July 14 darik para kali char(4) gonda, 4 am para hoita nemite kori thishe.