Stranger Things Season 5: Netflix announce korishe

US, 01 June 2025: Netflix officially announce kore dishe ki Stranger Things show laka panchta aru last season ketia release hobo. Sunday din Netflix ekta new promo video YouTube te upload korishe. Etu video duita minute ase, aru fans khan ke last season te ki ki expect koribo paribo, taikhan ke olop idea dishe. Announcement hisap te season 5 ke tin part te release koribole ase. Volume 1 available hobo November 27 din, 5:30 baje morning India time te. Volume 2 release hobo December 26 din, aru last volume hobo January 1, 2026 din same time te. Promo caption te likhe kina ase, “ Fight toh aro kotom hoa nai. Ready ho ja bhi epic series finale karone. Volume 1, November 26, 5pm PT. Volume 2, Christmas. Finale, New Year’s Eve. World te ekbar te release hobo, timing local timezone upar depend kore. #TUDUM.” Promo te main actors khan—Winona Ryder, Finn Wolfhard, Millie Bobby Brown aru Noah Schnapp—dekha jai ase jitu Upside Down laka gunda kan ke fight koribo ase, taikhan ready hoishe. Duffer Brothers, juntu show create korishe, 2024 November te episode titles announce korishe. Kunba episode laka naam ase The Crawl, The Turnbow Trap, Sorcerer, aru The Rightside Up. Co-creator Ross Duffer janai dishe ki ekta full year filming te lagaishe, aru 650 hours footage capture korishe. Taikhan laka beshi dangor aru most ambitious season hobo, “eight blockbuster movies” laka compare korile toh koishe. 2016 te start hoa journey ekdom dangor ending logot finish hobo.