16 January 2025 te Kiphire laga Yimkhiung Heritage Pungro te Tsungkamnyo cum Mini Hornbill Festival laga 2nd day manaisey. Kuntu te Advisor for Food & Civil Supply, Legal Metrology, K.T Sukhalu special Guest thakisey. Aro S. Kiusumew, Advisor of Home Guard & Civil Defence, Fire & Emergency Services tu etu event laga host thakisey.
Tailaga speech te, K.T Sukhalu para koisey Tsungkamnyo festival tu amikhan manu laga community aro cultural heritage celebrate kuribole laga ekta homoi asey. Etu nimitey etu tu community laga matlab ki asey etu sabole laga sahi homoi asey. Aro koisey ki Naga khan tu ekta community hoikina bisi saal para ek-dusra logotey milikina thakiasey aro etu ekey spirit logotey bhai-bhuini ekta hoikina continue kuribo lagey. Amikhan future ke saikina kamyabi aro agey baribole laga bhabna kuribo lagey. Tai para koisey, amikhan ekta community hoikina amikhan nijor laga naseeb bana manu hobo lagey.
Amikhan tu amikhan laga history(etihas) aro tradition pahoribole nalagey koikina, Sukhalu para koisey ki etu tu khali amikhan laga festival, jaati laga kapra aro nyom khan laga kotha hey nohoi hoilebi amikhan laga culture(sanskriti) tu busti laga mohol nohoilebi character te bana asey. Etu mohol nohoilebi character laga nishan tu community, ekey experience aro diya-baji kora asey. Ki tribe hoilebi, amikhan sob laga festival tu community festival nisna dikhibo parey kotey sob manu gana, dance aro bara khan ate shamil hoi. Etu nimitey, tai para etu event te jama huwa manukhan ke amikhan laga community te misa misi para alag-alag kuridiya tu hobole nidibole aro dangor aro majboot united(ekta hoikina thaka) Naga community nimitey request kurisey.
Sukhalu para koisey ki pora-likha tu poila para etya bisi jaruri hoijaisey, etu joldi-joldi change aha jamana te, eku bi guarantee nai. Khali pora-likha hoikina degree pa ekla nohoikina etya tu successful hobole nimitey nohoilebi kaam pabole nimitey technical skills bi thakibole bisi jaruri hoijaisey. Tai para jor dikina koisey ki yatey million opor bisi pora-likha thaka manu khan asey kun amikhan logotey ekey job aro resource khan nimitey compete(mukabala) kuribole asey. Etu nimitey, tai para youth khan ke mon-dikina mehnat kuribole advise disey. Ekey homoitey, tai para ama-baba khan ke bi baccha khan bhitor te taikhan para zindigi te kamyab hobole nimitey lagiya imandari aro discipline tu dhalibole advise kurisey.
Galat jankari aro fake news laga bari te tai para koisey ki amikhan para ajikali face kora dangor khatra khan majotey ekta tu galat jankari asey. Galat jankari tu poila para thakikina ahiasey. Hoilebi ajikali sob jag ate social media chola nimitey etu tu aro bi khatarnak hoijaisey. Artificial intelligence(AI) aro biya group khan galat jankari diya te amikhan para kuntu jankari ke biswas kurikina spread kuribo lagey etu choose kora te bisi savdhan hobo lagey. Education te amikhan laga knowledge laga bisi bhal foundation thaka para amikhan ke fake news aro asli news ke chinibole modod kuribo. Taki amikhan tu social media te pa sob video clip nohoilebi message ke biswas nukuribo. Amikhan ke asani para thogabo parisey koileyamikhan successful hobo naparibo. Amikhan para trends aro gossip(manu khan laga picheyte taikhan laga biya kuwa) ke suku bon kurikina follow kurisey koiley leader hobo naparibo. Tai para koisey ki naga khan ke nijor laga future decide kuribo lagisey koiley, amikhan tu atma aro dimag para strong hobo lagey.
Etu celebration te Laji Luyanba, General Secretary, YTC para welcome address disey. N.Y Choba Chang, President CKS tu Tribal Guest thakisey aro khata speech disey. Sanghpur busti aro Tsuyola para ekta special item present kurisey. Etu programme ke Rebecca Khiuphur aro Runshito Yimkhiung para cholaisey. Aro alag alag culture group para ekta cultural item present kurisey.
Add Comment