Sumit Nagal tu tournament khel te wapas ahibole asey

Bengaluru, March 16: 2025 tennis season laga first dui moina tu Sumit Nagal nimitey mushkil aro challenging thakisey. Etu season tu January te Australia laga Melbourne te suru hoisiley aro etu picheyte Rosario aro Buenos Aires te clay court te khilisiley. Etu 27 years laga player tu etu Tour para ek moina taak dur thaka picheyte, aha hapta te  Murica te ATP Challenger te khilibole nimitey tournament te wapas ahibole asey. Nagal, kunlaga ranking tu 132 te thakisey tai tu etu saal laga Jnauary moina te ekta unexpected situation face kurisey. Tai para etu toh COVID-19 asey koikina suspect kurithakisey. Nagal para ekta telephone interview te Times Of India(TOI) ke enaka koisey, “Judi ami eman bimar asey koikina janithakisey koiley, ami kityabi South America te jabole thakanai. Apni eman dur jai-asey, eman bhal halat te nai, etu toh eku matlab nabanai.” Nagal, kun juwa olop hapta tailaga Germany te thaka training base te bitaisey, tai tu astey-astey para wapas ahibole kaam kuriasey. India laga No. 1 tennis player, Sumit Nagal para enaka koisey, “Australia te khela picheyte, ami laga gao eman thik lagi thakanai, tatey Covid-19 thaka para hobo parey nisna lagi-asey, ami sure thakanai. Jitya ami Argentina te thakisey ami olop practice kurithakisey aro etu picheyte ami eman practice kurithakanai. Ami nimitey etu hapta khan tu eman bhal hapta thakanai. Ami laga gao tu bisi dukh paithakisey, ami kamjor lagi thakisey aro practice bi eman kurithanai. Aro jitya bi ami practice kurithakisey nohoilebi khili thakisey ami bisi bhagor lagi thakisey.” Nagal para ageybarikina enaka koisey, “Juwa dui hapta te amilaga gao bhal hoisey. Ami olop bisi practice kurithakisey, olop push kurithakisey.” Nagal tu duita ATP Challengers khilibole asey. Aro etu picheyte Monte Carlo Masters 1000 khilibole asey, kotey tai juwa saal qualifiers par kurikina 32 competitors laga round te gusisey. Etu picheyte, India para 250 Series tournament te sabole asey. Double rankings laga top-150 te 9 Indians asey hoilebi singles rankings laga top-250 te Nagal ekla ekjun India asey.