Sunita Williams, kun International Space Station te fasikina thaka duijun NASA astronaut majotey ekjun asey, tai tatey pungchikina 7 moina huwa picheyte Thursday din te tailaga first spacewalk complete kurikina aro ekta mukam hasil kurisey.
Sunita William aro tailaga astronaut sathi Butch Wilmore para Earth te wapas ahibole thaka tu technical problem nimitey postpone hoikina asey. Taikhan duijun tu June 2024 te ek-hapta lamba mission picheyte wapas ahibole laga thakisey. Etya taikhan tu March nohoiley April first faley wapas ahibole asey.
Thursday din te, International Space Station (ISS) laga maintenance kuribole nimitey, Sunita Williams kun ekta kamyab astronaut asey aro tai poila te bi space visit kora homoitey bisi spacewalk complete kurisey tai astronaut Nick Hague logotey partner kurisey.
Taikhan duijun tu international docking adaptor te ekta reflector device bodli kuribole aro NICER X-ray telescope(durbin) te patch light filter aro station orientation control kora equipment repair kuribole nimitey bahar olaisey.
Taikhan duijun tu connection tools aro access point khan check kuribole thakisey kuntu ke ahibole homoitey Alpha Magnetic Spectrometer te maintenance kuribole jaruri hobo. Etu tu ISS te thaka ekta particle physics testing instrument asey.
Etu majotey, NASA para koisey ki Sunita William laga career te etu 8ta wala spacewalk kuntu 6 hours loisey, etu walk tu bisi bhal para jaisey aro taikhan para ki kaam complete kuribole thakisey etu bi complete kuriloisey. 12 years te etu tailaga first spacewalk thakisey.
Williams para tai low-Earth orbit mission nimitey tayar huwa homoitey radio te enaka koisey, “Ami bahar olaiasey”.
Add Comment