Suspected gas leak hua piche deh 30 students kan hospitalized hui jai shae

October 26, 2024: Chennai laka ekta private school deh pura 30 laka upor students kan hospitalized hui jai shae, ekta suspected gas leak hua piche deh. Taikan bishi wak tho behosh hui jai shae aro sas lubo leh para taka nai. Sob students kan tho safe ase, authorities kan para kui shae. Taikan para gas leak tho itia b confirm hobo leh baji nah ase kui shae.Hoile b ama baba para school management keh botnam di shae, taikan keh janai nadia karne. Bacha kan para media keh, teachers kan taikan laka complaints keh dismiss kuir shae kui shae.National Disaster Response Force (NDRF) personnel kan school laka jaka deh punchi nah taki shae, shaam deh tho. “Mukan kinaka hui shaem etu tho kubo leh napari bo,” NDRF commander Ak Chauhan para school keh inspect kura piche deh kui shae. “Mukan laka team kan para situation keh assess kuri shae. Itia tho gas laka khun thon ai. Air conditioner para eku leakage tho nai. Safety precaution kan lui nah ase. Jaka deh kun bah toxic gas kan taki shae pareh hoile b mukan itia b sure para kubo napareh. Students kan safe ase itia tho.”