Tamil Nadu lockdown aro July 19 dak othaishe

Chennai: Tamil Nadu government para aji state te coronavirus lockdown toh aro July 19 darik dak othai-thishe aro konuba jaga te restrictions thaka toh hataishe koishe. Etu restrictions komti kora toh hoile COVID-19 bemari cases neji te kera nemite ase koishe. Itya dukan toh thiri kulikena 9 pm te bondh koriboli janaishe. Restaurants, tea shops, bakeries, roadside eateries aro sweet dukan toh 9 pm dak 50 per cent customers te kulibo. Etu jaga te Covid hoshari neum toh jolaikena dukan bahar te sanitisers rakiboli koishe aro manuh khan logot line te social distancing thakiboli janaishe. Air-conditioned dukan te ventilation thakina doors aro windows kula rakiboli aro janaishe. Weddings kora samai 50 manuh jama koriboli paribo aro funerals te 20 jun oper manuh jama nakoriboli koishe. Schools, colleges, bars, theatres, swimming pools aro zoos toh bondh thakibo, Cultural aro political events nemite public khan samil koriboli mana ase. State te itya dak be inter-state buses pera soruh howa nai, hoilebi osor Puducherry dak te bus services toh aro soruh korishe koishe. State aro central government jobs nemite written tests toh exam centres te SOPs manikena thakiboli paribo koishe. Last Saturday din te be state government para lockdown thakilebi alag-alag relaxations janai thishe aro hotels, lodges aro guesthouses toh aro kuliboli koishe. India laga States pithor te Tamil Nadu te coronavirus cases toh 4^th besi wala ase. Friday din Tamil Nadu te 3,039 COVID-19 cases thurishe aro bemar para 69 manuh morishe koishe. Notun bemar cases toh jowa din logot komti wala thakishe. Etu virus bemar soruh howa beche state te itya dak te 25.13 lakh bemari cases ase koishe.