Bulgaria, 21 August : Indian wrestler Tapasya Bulgaria te hobo thaka U20 World Wrestling Championships 2025 te desh karone agey gold medal jiti loise. Tapasya women’s 57kg category final te Norway laga Felicitas Domajeva ke 5-2 para harai loise kali din. Asian U20 championship gold medallist Tapasya laga campaign shuru kora hoise Dolzhon Tsyngueva ke pin kori, juntu time te tai already 6-0 para lead kori thakise. Quarter-final te tai France laga Romaissa El Kharroubi ke fast win kori dise, aru semi-final te Japan laga Sowaka Uchida logot ekta tight match te 4-3 para jiti loise.
Women’s 68kg category te India laga Srishti silver medal jiti loise Japan laga Ray Hoshino logot final te 0-7 para haribole piche. Semi-final te Srishti Germany laga Laura Koehler ke 7-3 para harai loise. Etu piche te Priya Malik aru Reena bhi nijor-nijor category laga final tak pounchise. Priya women’s 76kg semi-final te Serbia laga Evelin Ujhelji ke 10-0 para dominate kori loise, aru Reena Romania laga Voiculescu Alexandra ke 11-1 para harai loise women’s 55kg category te.
Men’s event side te Sumit Malik silver medal settle kori loise 57kg category te, Russia laga Magomed Odzamiro logot 5-8 para hara pora Tuesday din.
Aji tak, Indian wrestlers milaike total tinita medal loise — ekta gold aru duita silver — U20 World Wrestling Championships 2025 te. Last year Spain te hobo thaka World Championships te India 7 medal loithakise — ekta gold, ekta silver aru pachta bronze. Tai time te women’s 76kg category te Jyoti Berwal ekta matra gold medal anithakise.
Add Comment