Agencies, 31 May: Famous adventure movie ‘Tarzan: The Epic Adventures’ laga star actor Joe Lara toh plane crash te morise Tennessee jaga te. Etu 58 omar actor toh tai laga maike (wife) aro tusara konbah logote private jet te thakise. TMZ hisab te private jet toh Cessna 501 thakise aro etu toh Smyrna Airport jaga para Saturday (local time) te Palm Beach phali jai thakise hoilebe takeoff hoikena besi deri nahowa bechite Percy Priest Lake te kira thakise.
Accident bechite, fire aro tusara bachabole crews toh hatsa jaga te jaa thakise hoilebe pura rati operation bechite authorities para TMZ ke passengers toh accident para moraideshe koise.
Tai khan laga families ke toh joldi janaideya thakise aro TMZ hisab te investigation toh jai ase hatsa howa laga karan janibo nemite.
TMZ para sob melikena seven manu toh accident te mora janishe. Lara toh tai laga spouse Gwen Lara (ekta Christian diet guru) logote thakise. Tusara khan toh locals thakise.
Lara toh jungle laga raja Tarzan hisab te sob melikena 22 episodes korise 1996 aro 2000 majote. Tai be TV movie ‘Tarzan in Manhattan’ kowa te thakise.
Tai para be tusara action-fantasy roles toh movies -‘Steel Frontier’, ‘Sunset Heat’, ‘Gunsmoke: The Last Apache’, ‘American Cyborg: Steel Warrior’, ‘The Magnificent Seven’, ‘Baywatch’ and ‘Tropical Heat – nesana khan te korise. TMZ hisab te, Lara aro Gwen toh tinta bacha charikena jaishe.
Add Comment