New York, 10 June : Taylor Swift para fans khan ke surprise dia karne aru ekbar headline bonaise. Singer tu Toy Story 5 laga world premiere te attend korise aru khali red carpet te walk korikena nohoi, stage te performance bhi dise.
Disney aru Pixar laga etu film June 19 te English aru Hindi te cinemas te release hobo.
Premiere pora videos khan social media te viral hoi jaise. Etu video khan te Taylor ke composer Randy Newman logot stage te dikhaise, kot taikhan “I Knew It, I Knew You” song perform korise. Audience para etu performance ke khub bhal response dise.
Taylor para sunshine-yellow outfit pindhi thakise aru Randy piano bajai thaka somoy stage te uthi kena notun song perform korise.
Notun song chara bhi, tai franchise laga iconic hit song “You’ve Got A Friend In Me” bhi gai dise, juntu pora tai Toy Story franchise laga dangor fan ekta ase kuina aru ekbar dikhai dise.
“I Knew It, I Knew You” tu October te The Life of a Showgirl release hua pichete Taylor laga first original song ase.
Etu song tu Jack Antonoff logot milikena co-produce korise. Taylor aru Antonoff para 2014 laga album 1989 pora 2024 laga The Tortured Poets Department bisi projects te eki logot kaam kori ahise.
Taylor para bhi janai dise ki etu track laga tinta CD single versions preorder karne available thakise. Ekta film version ase, aru ekta acoustic version, juntu somoy end wala piano version ase.
Fans khan laga interest karone, tinta versions bhi khub jaldi sold out hoi jaise.
