THONOKNYU TE KHOZAOSIE HOK-AH FESTIVAL KHOTOM HOISEY

MLA P. Longon para 22 January 2025 te Thonoknyu Town te huwa Khozaosie Hok-ah festival of Feast and Rest laga closing ceremony grace kurisey. 

Deputy Chief Minister of Nagaland T.R Zeliang kun etu din laga Guest thakisey, hoilebi tai kiba situation nimitey etu attend kuribole paranai. Hoilebi tai para Khiamniungan community ke ekta message pathaikina Khozaosie Hok-Ah laga greetings janaisey aro ahibole napara nimitey apsoos jataisey. 

Tailaga message te T.R Zeliang para koisey, “Nagaland tu land of festival asey kuwa tu hosa asey. Kilemaney  saal laga hodai moina te alag alag tribe khan para ekta nohoile ekta festival manai thakey. Sob tribe laga festival te taikhan laga alag ekta meaning aro kahani thakey kuntu ke bisi sundur para dusra generation ke pass korey aro celebrate korey. Tai para enaka koisey, “Aji, apni khan para Khozaosie Hok-Ah koikina bara-khana kora aro aram kora laga ekta festival celebrate kora homoitey, apni khan sob etu ke bisi bhal para celebrate kuribi aro akha kuriasey ki etu para sob ghor te kokai-bhai nisna rishta thaka tu aro tagra banaidibo aro sob ke shanti anidibo.”

Etu occasion te kotha kora homoitey, MLA P. Longon para Khozaosie Hok-Ah ke khali khana khan kha aro aram kora homoi ekla nohoikina dusra khan ke maaf kuridiya aro shanti ana laga homoi bi asey koikina koisey. Tai para community te ek-dusra logotey mili julikina thaka tu majboot kuridibole aro manu khan majotey unity anibole te etu festival laga role ki asey etu laga bari te koisey. 

Etu event te mojud thaka student khan ke address kurikina, Longon para taikhan ke zindigi laga sob mor te mondikina kaam kuribole encourage kurisey aro taikhan ke nijor aro sob manu laga growth nimitey education aro girisey koilebi har namanikina agey barithaka laga importance janaisey.

Khiamniugan community tu modernization te baki duniya khan logotey agey barithaka homoitey, Longon para manu khan ke taikhan laga culture aro tradition tu dhurikina rakhibole aro napaoribole request kurisey.

Khozaosie Hok-Ah celebration te, 4^th Handicraft festival tu dhoom-dham para manaisey. Etu te local manu khan ke taikhan laga skill aro kalakari dikhabole ekta platform dikina etu jaga laga rich cultural heritage aro kalakari dikhaisey.

Etu festival laga ekta highlight tu alag alag category te bisi competition rakha tu thakisey: Nie eiu Aking-e competition te, 1^st price tu Mongshai para paisey aro 2^nd price tu Shaniu para paisey. Ehloniu echan competition te, 1^st price tu Chongpe para paisey aro 2^nd price tu Thingpia para paisey. Viotsom ou competition te, 1^st tu  Patsou 1^st aro 2^nd tu Meehu para paisey. Aro Ein ship ou competition te, Patsou para 1^st aro Longon para 2^nd paisey.