Tiger Shroff ke acting ke loikina criticize kora homoitey Ahmed Khan para taikey support kurisey

New Delhi, June 23 : Actor Tiger Shroff, kun laga career laga suruwat bisi bhal para hoisiley tailaga lagatar 3ta poisa bisi dhalikina bana film – Heropanti 2, Ganapatha ro Bade Miyan Chote Miyan flop huwa nimitey biya homoi para gujri asey. Hoilebi Tiger Shroff laga acting skills ke loikina manu khan para taikey criticize kuri thaka homoitey filmmaker Ahmed Khan para agey ahikina Tiger Shroff ke etu koikina defend kurisey ki Tiger tu ekta commercial actor asey. Ahmed para Tiger Shroff ke ‘Baaghi 2”, “Baaghi 3” aro “Heropanti 2” film te direct kurisey. Ekta interview te Ahmed para koisey ki Tiger Shroff tu superstardom te wapas ahibole nimitey khali ekta film laga doori te asey. Ekta interview te jitya Ahmed ke Tiger Shroff tu ki golti kuri asey etu hudisiley. Ahmed para jawab dikina koisey ki tai para etu buji di asey ki film sa manu khan niras hoi asey. Hoilebi Tiger tu superstardom(ekdam mashoor aro kamyab) hobole laga rasta te berai asey. Tai para koisey ki Tiger tu film laga set te thik homoi tea hey, taikey ki kuribole koi sob korey. Tailogotey body asey, looks asey. Tai dance kuribo parey, acting bi bisi bhal korey. Tai commercial film korey. Aro tai etya kuntu homoi para gujri asey etu tu ekta sikh nisna asey. Sob hero bi enaka homoi para gujrisey aro sob para bi enaka sikhisey. Tai aha saal wapas uthikina kamyabi hasil kuribo. Tai para Heropanti 2 nakmayab huwa laga bari te bi koisey aro Baaghi 3 tu Covid-19 nimitey katikina khata kuridiya laga bari te bi koisey. Ahmed para koisey ki Tiger Shroff tu bisi monduk hoisey kilemaney taikhan para bisi mehnat kurisiley.