2020 te India-China border te jhamila ola picheyte ban kuridiya bisi Chinese app tu India te Play Store te wapas ahisey etu duita desh laga rishta improve hoija picheyte. Xender, TanTan aro Shein nisna app khan tu etya aro wapas download kuribole pari asey. Hoilebi India te sobsey bisi popular huwa Chinese app TikTok tu etya tak bi play store te India nimitey available nai. Political naksa bodli hoithaka homoitey, kunba ban hoikina thaka Chinese app wapas aha logotey sob manu laga dimag te ekta question chuli asey: Tiktok India te wapas ahibo na nai?
Najanikina thaka manu khan nimitey, June 29, 2020 te Prime Minister Narendra Modi para lead kora BJP government para TikTok aro dusra 58 Chinese app ban kuridisiley, data security laga chinta kurikina. Indian government para dangor Chinese Technology company ByteDance laga Tiktok app ke data(jankari) laga galat istamal kora aro jasusi kora laga hathyar nisna chola laga accuse kurisey. Etu decision tu Line of Actual Control (LAC) te Chinese aro Indian sipahimajotey ekta khatarnak larayi olaikina dui hapta huwa picheyte ahisiley.
June 15 te Ladakh laga Galwan valley te India aro China majotey larayi huwa picheyte China logotey rishta bhangaidiya homoitey India para TikTok ban kuridisiley. Etu larayi te 20jun Indian sipahi murisey. Line of Actual Control (LAC) te ola etu larayi tu 45 years picheyte huwa sobsey khatarnak wala thakisey.
Kunba ban hoikina thaka Chinese app tu chutu-chutu changes logotey ahisey aro kunba khan tu original nohoikina etu app khal laga copy hoikina ahisey.
TikTok, ekta bisi popular video-sharing app bi dusra 58 Chinese apps logotey June 2020 te ban hoisiley, desh laga security aro data privacy laga chinta jataikina. India te ban huwa homoitey TikTok laga pura duniya para 200 million users thakisey. Indian market para TikTok ban hoija tu etu app laga global presence te ekta dangor jhatka thakisey. Hoilebi, utu homoi para loikina etyatak TikTok tu India te wapas ahibole asey na nai etu ke loikina bisi kotha chuli asey.
TikTok tu khali India ekla nohoikina dusra desh khan te bi ban hoikina asey. Latest TikTok ban kora desh tu United States asey. Etu ke ban kuridiya desh khan para ban kora laga karon tu security risk thaka aro data privacy bhanga nimitey asey koisey.
December 2019 te, United States Army aro Navy para government laga mobile phone khan te TikTok ban kuridisiley, Department of Defense para etu para security ke dhali asey kuwa picheyte. Suru te, US para Bytedance ke etu app US te bikri kuridibole nohoiley ban face kuribole koisiley.
India nimitey toh, TikTok wapas ahibole laga chance ekdam nathaka tu nohoi. Hoilebi bisi mushkil asey. Indian government para safa safi koidisey ki taikhan tu data privacy, desh aga security aro taikhan laga digital ecosystem laga suraksa ke prioritise korey. TikTok India te wapas ahibo na nai etu toh TikTok para etu requirements hisap te chulibo na nai aro China-India majotey chulithaka jhamila tu address kuribo paribo na nai etu opor te depend korey.
India te TikTok laga future tu government para bana kanoon, market dynamics aro local demand hisap te adjust kuribo paribo na nai etu opor te depend korey.
Add Comment