Tinsukia: Grenade blast te 1 jun morishe, 3 jun jokom

DIBRUGARH: Friday din Tinsukia district laga Tingrai bazaar te grenade blast para 1 jun morishe aro dosura 3 jun jokom hoishe koishe. Blast te mora manuh khan toh Sanjit Singh (25) umer, Tingrai Hunkapukhuri ase aro dosura 3 jun blast te jokom howa khan toh Monjit Das, Sujit Talukdar aro Ganasyam Agarwala ase. Tai khan ke Assam Medical College & Hospital (AMCH) te elaj nemite loikena jaishe. Khobor para koishe ke, tuita(2) motorcycle te grenade toh hardware dukan osor te rakishe aro etu dukan malik nam toh Turan Agarwalla thakishe. Grenade blast khobor kora samai, Tinsukia Superintendent of Police P Vaibhav Nimbalkar para koishe, “grenade blast te 1 jun morishe aro 3 jun besi serious te jokom paishe. Tai khan ke hospital te elaj nemite loikena jaishe. Itya dak te ke hesab te blast hoishe khobor toh koboli naparibo, ami khan investigation soruh hoishe aro kaun laga kam ase khobor nai, ami khan laga investigation toh soruh hoishe” koikena SP para khobor toh janaishe. Khobor para koishe ke, etu blast toh ULFA (I) laga kam ase. Etu neshina incident ekta May 11 (Tuesday) din te Assam Tinsukia district, Khota Sema bosti te grenade blast te 12 umer 1 jun morishe. Olop din akhe  Himanta Biswa Sarma, Assam laga notun Chief Minister howa beche, tai para ULFA (I) Commander-in-Chief Paresh Baruah logot arms jarikena kotha koriboli mathikena ase koishe.