Tobacco industry laga dhokadhari

‘Hodai saal India te tobacco karney 13 lakh maan manu para taikhan laga jaan gawaisey….Tobacco tu youth khan majotey ekta fashion statement hoijaisey hoilebi etu para cancer nisna khatarnak bimari olabo parey.’ Etu bayan tu Union Minister of State for Health and Family Welfare, Government of India para Tuesday din te Tobacco Free Youth Campaign 2.0 laga second edition laga launch te kotha kora homoitey disiley. Ministry of Health and Family, Government of India laga ‘ekta dangor initiative(kadam)’ manikina etu campaign laga maksat tu tobacco laga bari te awareness feilabole aro youth khan majotey ekta tobacco-mukt lifestyle promote kuribole laga asey aro etu campaign tu September 24 para November 24 taak chulibole asey. National Tobacco Control Programme, Nagaland para bi etu 60-day ‘Tobacco Free Youth Campaign 2.0’ join kurisey kuntu ke September 24 te Kohima te officially launch kurisiley. Etu campaign ke District Tobacco Control cells para 11 NTCP district te one by one launch kurisey. Etu 60-day campaign te 5ta main area ke prioritise kuri asey : etu main area khan tu  tobacco laga khatra laga bari te public khan majotey jankari feila, khas kurikina youth aro rural(busti laga) community khan majotey; School aro college khan ke tobacco para mukt kuribole karney Tobacco-Free Educational Institutions (ToFEI) laga nutun guideline manikina chola tu improve kora; tobacco control kanoon ke lagu kora tu aro majboot bana, khas kurikina COPTA 2003 aro Prohibition of Electronic Cigarettes Act (PECA) 2019, youth khan ke tobacco asani para pabole nidibole karney; Tobacco-Free busti promote kora, kotey communities khan tobacco ke pura puri hataidibole aro healthy mohol banabole karney eksath kaam korey; aro jawan manu khan ke tobacco laga khatra aro tobacco charidiya laga faida laga bari te kara message dibole karney digital platform laga istamal kora. Nagaland te etu ‘Tobacco Free Youth Campaign 2.0’ campaign para  school, college aro community organization khan ke workshop, awareness drive aro student aro jawan manu khan logotey baat-chit kora laga session through para engage kuribole aim kuri asey. 2023 laga ekta report te, World Health Organisation(WHO) para etu highlight kurisey ki tobacco para etu ke nacharikina thaka adha maan manu ke moraidiye. Tobacco para hodai saal 8 million opor morey. Etu majotey 1.3 million manu tu smoke nokora manu khan asey kun khan second-hand smoke(matlab dusra smoke kora manu khan para chara dhunga) laga sikar hoi. April 22, 2024 te ola aro ekta report te, WHO para etu bi highlight kurisey ki ‘ajikali tobacco chola majority manu khan tu taikhan adolescents(10 to 19 years majotey) thaka homoitey kha suru kurisey. Etu campaign chuli thaka homoitey, Government para tobacco industry ke check kuribole laga arsta olabo lagey aro policies(nyom khan) regulate kuribo lagey. Tobacco industry para nijor ke dura business nisna dikhaikina public khan ke taikhan laga bustu khan tu suraksit aro addict nuhuwa laga asey koikina dikha tu etu generation karney nutun kotha nohoi. India laga WHO Representative para koisey, “Etu industry para jawan manu khan ke lalchabole nimitey nutun media tools aro harm nukuribo nisna dikha bustu khan logotey ekdam akarshit kuridiya laga marketing campaign cholai.”  Ahibole thaka generation ke tobacco addiction laga khatra para mukt kuribole nimitey, duniyabhor te government khan para tobacco industry laga  misa misi advertisement aro dusra media campaign khan ke handle kuribole nimitey nyom banabo lagey aro etu nyom khan ke kara para lagu kuribo lagey.