London, 5 May : England laga right-back Trent Alexander-Arnold confirm kori dise ki tai Liverpool club change koribo, juntu club te tai chhota pora khelti ase. Tai eneka faisla ke “tai laga jibon laga sobte dangor aru muskil faisla” buli koi dise.
Alexander-Arnold, jun last week te Liverpool ke Premier League jituwa te help kori dise, take Real Madrid te free transfer te join koribo laga khobor bhi ase.
Alexander-Arnold laga 20 saal laga Liverpool te thaka journey June 30, tai laga contract khotom hobo din te officially end hobo.
Tai 6 saal age te Liverpool laga Academy join kori thakise, aru youth level te training lwi lwi, 9 saal age senior debut korise.
Aji tak Alexander-Arnold 352 ta match Liverpool nimite kheli se, 23 ta goal score korise, aru 8 ta dangor title jiti se, juntu majot last week laga Premier League title bhi ase.
26 saal laga Alexander-Arnold, season shuru hote tini jon important Liverpool player majot ekjon thakise jun laga contract summer te khotom hobo. Mohamed Salah aru Virgil van Dijk laga contract 2 saal extend kora hoise, kintu Alexander-Arnold ke club ektao fee na lwi change koribo dibo.
Add Comment