Agartala, November 6 : Ekta asurit kuridiya laga ghotna te, Raju Debnath koikina ekjun 30 years laga manu para tailaga 65 years laga ama, Shanti Debnath ke moraidisey.
Etu ghotna tu Tripura laga North District laga under te thaka Dharrmanagar jaga laga Radhapur Gram Panchayat laga Ward No. 3 te hoisey.
Etu asurit kuridiya ghotna tu titya samne te ahisey jitya mujrim laga ama Shanti Debnath laga ghor te aha ekjun electric bill laga meter set kora manu para tailaga room laga dorja eman taan para bon hoikina thaka paisey aro khoon laga nisan dikhisey aro ekdam biya smell paisey.
Etu dikha picheyte chowkana hoikina etu electric bill laga meter pora manu para tatey laga manu khan ke janaidisey .
Etu picheyte tatey boha manu khan para logalog police ke jankari disey.
Tatey pungcha picheyte, police officer khan para Raju Debnath ke matisey kun para tailaga ghor para bahar olaikina taikhan ke Shanti Debnath laga dead body khoon laga pool te girikina thaka dikhaisey.
Raju para etu kubul kurisey ki tai para tailaga ama ke Friday rati te ekta kulhari para marikina moraidisey.
Aro etu picheyte tai para tailaga ama laga dead body ke taikhan laga ghor bhitor te thaka ekta temporary(olop homoi nimitey bana) chenta te lukabole kosis kurisey. Hoilebi kiba karon nimitey tai para tailaga etu bhayanak kaam tu pura kuribole paranai.
Tatey boha local manu khan para Raju para poila te bi tailaga ama logotey jhagra kuri thakisey koisey.
Raju laga ama Shanti Debnath laga mota, Gitendra Debnath tu Agartala te bohey aro taikhan laga chukri Soma Debnath tu Assam laga Haflong district te tailaga mota laga ghor te bohey.
Shnati Debnath laga dead body tu Dharmanagar jaga laga North District Hospital murda ghor te rakhikina asey. Aro tailaga post-mortem tu Tuesday din te kuribole asey.
Post-mortem kora picheyte, tailaga dead body tu tailaga mota aro chukri ke didibo.
Add Comment