Agartala, April 08 : Ekjun senior police officer para koisey, Tripura te election nimitey 12,000 maan central aro state paramilitary forces khan ke duty te dhalibo.
Tripura West Lok Sabha seat aro Ramnagar assembly seat laga by-election te vote kora tu April 19 laga first phase te hobo. Aro Tripura East Lok Sabha seat laga vote diya manu khan para April 26 laga second phase te taikhna laga vote dibole laga haak cholabo.
Assistant Inspector General (Law and Order) Jyotishman Das Chaudhury para koisey, “Central Armed Police Forces (CAPFs) laga total 84 company ke elction nimitey rajya te duty te dhalikina asey. Aro CRPF laga 14 company tu Thursday din te pungchibole asey.”
Tai para koisey ki aro central forces khan ke duty te nadhalibo kilemaney rajya te election conduct kuribole nimitey 84 company kafi asey.
Central Armed Police Force (CAPF) laga ekta company te 80-100 personnel thakey.
Etu opor te, state paramilitary force, Tripura State Rifles laga 4,500 maan personnel ke bi election logotey jurikina thaka duty khan nimitey pathabole asey. Border Security Firce(BSF) tu India-Bangladesh international border fale satark hoikina thakibole asey.
Tai para koisey ki kunba central forces khan ke Tripura East Lok Sabha constituency te shift kuridibo Tripura West seat aro Ramnagar assembly constituency laga first phase voting complete huwa picheyte.
Tripura West Lok Sabha seat laga Returning Officer, Vishal Kumar para koisey ki rajya laga 1,685 vote diya booth majotey 565 voting booth tu gondogol hobole laga khatra te asey aro etu khan nimitey tight security kadam uthabo.
Security forces khan para samaj te nafrat feila manu khan including drugs dhanda kora manu khan laga khilaf te already operation suru kuridisey.
Tripura East Lok Sabha constituency te 1,664 polling booth asey.
Add Comment