Tripura, 25 March : Tripura laga power department ekta plan banai loise juntu state laga alak-alak jayga te electricity paana families aru public places khan ke bijuli dibo, koi Power Minister Ratan Lal Nath March 25 tarik te announce kuri dise.
Tai koi thakise ki itu initiative Dharti Aaba Janjatiya Utkarsh Abhiyan (DA-JGUA) project laga under te ase, juntu Department of Tribal Welfare, Government of India pora chali thake.
Minister koi thakise ki itu project Tripura State Electricity Corporation Limited (TSECL) aru Tripura Renewable Energy Development Agency (TREDA) pora PM-Janaman aru PM-Divine project laga under te solar microgrid system pora implement kuri thakibo.
Itu information BJP MLA Shambhu Lal Chakma aru Tipra Motha Party MLA Paul Dangshu laga question ke respond kuri thaka time te minister disclose kuri dise, juntu Tripura Legislative Assembly laga third session day te hoise.
Power Minister koi thakise ki DA-JGUA project tu State Distribution Reform Committee pora February 10, 2025 te approve kuri dise.
“Etu ekhon Cabinet approval rukhi ase. State Cabinet approval paya pichete, DA-JGUA project laga kaam shuru hobole ase. Itu kaam December 2025 te complete hobole ase,” koi dise.
Tai aru koi thakise ki, itu project laga alaba bhi, PM-Janaman aru PM-Divine project laga under te solar microgrid system pora sob ghor khan ke electricity connection dibole kaam cholai ase.
“PM-Janaman project laga under te electrification kaam August 2025 te complete kuri lobole ase, aru PM-Divine project laga under te December 2025 te complete hobole ase,” minister koi dise.
MLA Nirmal Biswas laga ekta written question ke reply kuri thaka time te minister koi dise ki hali te 11,692 households ke PM-Janaman project laga under te TSECL pora electricity dibo parese, aru 372 households ke PM-Divine project pora traders khan diya ase.
Mili kena, itu duti organization pora total 12,064 households ke electrification under te anibole parise.
Add Comment