US Supreme Court para Janauary te 26/11 atangwadi attack laga mujrim Tahawwur Rana ke tai para kuntu desh te etu attack kurisey etu desh ke handover kuridibole laga rasta clear kuridiya picheyte, US President Donald Trump para Friday te announce kurisey ki US administration para “duniya laga sobsey biya manu majotey ekjun manu ke handover kuribole approve kurisey.”
Prime Minister Narendra Modi tailaga side te thakikina, Trump para enaka koisey, “Aji, ami etu announce kuribole khusi pai asey ki amilaga administration para ekjun sajish kora manu aro duniya laga ekta sobsey biya manu ke dusra desh ke handover kuridibole approve kurisey. Aro Mumbai terrorist attack te tailaga haath thaka nimitey, tai India te sajai pabole asey. Toh, tai India te sajai pabole wapas jai asey.”
January 21 te, US Supreme Court para etu case te Rana laga review petition reject kuridisiley.
Trump para etu bi announce kurisey ki India aro US tu duniyabhor te Islamic atangwad laga khatra laga samna kuribole nimitey poila kitya bi nokora nisna ekey logotey kaam kuribo.
Rana, Canada te boha ekta Pakistani origin laga manu asey. Tai tu etya Los Angeles laga ekta metropolitan detention centre te asey. Tai tu Pakistani-American terrorist David Coleman Headley logotey milikina asey, kun 26/11 attack laga ekta main sajish kora manu asey.
Trump para enaka koisey, “Tai tu India te sajai pabole nimitey wapas jabole asey.” “Amikhan para taikey logalog India ke wapas di asey aro bi dusra mujrim khan ke bi enaka pathaidibo parey kilemaney New Delhi para aro request ahi asey.”
Etu laga jawab te, Modi para enaka koisey, “Ami President ke dhanyabad di asey ki tai para etya etu mujrim ke India ke handover kuribole faisla kurisey, kun para 2008 te India te bisi manu ke moraidisey.”
Picheyte, Foreign Secretary Vikram Misri para koisey ki India tu Rana ke desh te anibole te kaam kuri asey. Tai para enaka koisey, “Olop final step complete kuribole baki asey. Etu duita side(India aro US) tu etu mamla ke loikina baat-chit kuriasey.”
Add Comment