Turkey hatyar rakha jaga deh putha pora seven manu moraidese

Agencies, 10 November: Saturday din Turkey’s president pora kowah toh, southeast phalli hatiyar rakha jaga deh bomb puthise. Etu pora nai-nai koilebe 7 manu moraidese aro tusara 25 jun jokhom korise.  Etu agae Defence Minister pora Friday din kowah toh, hatyar khan rakha jaga deh achanak pora hamla howah karni 25 jun jokhom korise aro seven jun haraise. Blast toh Iraq aro Iran border osor, Hakkari province jaga deh howah ase. Etu hatyar rakha jaga toh Kurdish pethor-manu logode target koribo karni besi phak jola laga ase. Turkish republic’s founder, Mustafa Kemal Ataturk mora din laga 80th anniversary time deh President Recep Tayyip Erdogan pora kowah toh, hatyar rakha jaga deh blast howah karni jar jun moraidese aro tusara 25 jun jokhom korise. Erdogan pora jar jun manu jokhom pai kena thaga khan ektum halat beya deh ase koise. Aro tai khan logode Ankara laga hospital deh helicopter pora loi jaise koise. Tusara khan toh Hakkari province laga hospital deh ase. President pora blast toh ke karni hoise investigate kori ase koise. Blast toh training time deh hoina pethor manu logode hamla kora time deh hoise jani napai kena ase.