ULB Election kan etu jaka kan deh peacefully kotom kuri shae

June 28, 2024: Mokokchung pitor deh Urban Local Bodies (ULB) laka election tho peacefully 26^th June 2024 din deh lui shae. District deh free aro fair election taki bo karne sob polling stations kan deh district Administration aro Security personnel kan cover kuri shae.

Mokokchung Municipal Council election kan para Changtongya Town Council deh 82% voters turnout record kuri shae, Changtongya Town Council deh 67.7%, Tuli Town Council para 81.7% record kuri shae aro Mangkolemba Town Council deh 94.77 % record kuri shae.

(DPRO Mokokchung)

Medziphema 

June 28, 2024: Medziphema Town Council karne first ULB election tho 26^th June 2024 din deh lui shae aro jamala kan laka report nata kina peacefully kotom hui shae. Town lokot deh notha Wards ase, 11 polling stations lokot deh. Tateh para Ward no. 7 tho unopposed ase kui nah declare kuri shae. Medzhipema lokot deh 5,474 electors taki shae aro tateh para 2,736 jun tho mota aro 2,738 jun tho maike.

Overall voters turnout tho 87.35 % deh record hui shae aro eku jamala aro violence kan nata kina polling tho peacefully kotom hui shae.

(IA Medziphema)

Wokha

June 26, 2024: Wokha Town Council election kuto  26^th June 2024 deh taki shae, etu election tho peacefully kotom hui shae, eku jamala kan natakinah. Wokha district deh taka sob polling station deh free, fair aro smooth electioneering process conduct kuri shae.

Ekta war deh, colony Council Chairman (GA Project-Ward-9) Observer & Addl. Secretary, Hiazu Meru laka visit time deh, chairman para ward voters kan keh free, fair aro peaceful election conduct kuri b kui shae aro fake voters kan keh voting process deh participate nakuri b kui shae.

Wokha Town Council karne overall poll percentage tho 89.77% taki shae, 11 wards karne aro 15 wards para, chartha candidates tho unopposed hui nah elect kuri di shae.

(DPRO & IA WOkha)

Bhandari 

June 28, 2024: Bhandari Town Council election 2024 laka ULB Election karne 93.25% voters kan, taikan laka franchise exercise kuri bole ahi shae, 25^th June 2024 din deh. Polling tho aram she kotom hui shae,

Total 9 wards para, polling tho satha wards karne lui shae, kile koile NPF Party para tuita candidate tho unopposed jiti shae.

Sob milai nah, election deh choitha maike candidates aro 15 mota candidates kan election deh contest kuri shae. 

22 sal laka maike aro ekta fresh college graduate, Nzanrhoni I. Mozhui, kun Issac Mozhui laka maike bacha ase, tai BJP ticket deh sobse jawab candidate taki shae. Alak side deh 79 sal laka Khosathung Tsopoe, kun Pangti bosti para ase, tai NPF ticket deh sobse bura candidate taki shae, ULB election, Bhandari deh.

Joint Secretary & Observer, Avelu Ruho NCS, aro ADC & RO, Bhandari, Longdiba L. Sangtam para sob polling station aro wards kan keh visit kuri shae, election laka peacefull aro smooth conduct ensure kuri bo karne.

Chozuba

June 26, 2024: Chozuba Town Council karne ULB election tho26th june 2024 din deh lui shae aro polling aro peacefully kotom hui jai shae. Sob milai nah 28 candidates kan contest kuri shae notha wards pitor deh. Utu 28 candidates pitor deh noh jun tho maike taki shae aro alak 19 jun tho mota kan taki shae.

(Kisa, IA Chozuba)