ULFA (I) para 3 moina nemite ceasefire junaishe

May 15, 2021. Saturday din te United Liberation Front of Asom-Independent (ULFA-I) para tin(3) moina nemite unilateral ceasefire thakiboli khobor toh junai thishe. “ami khan besi hosa kotha para Assam indigenous logot janai ase ke, itya Coronavirus halat beya jai thaka nemite, ULFA (I) khan aji para loikena tin(3) moina nemite military kam kori thaka sob roki thakiboli fesla toh junai ase,” koikena ULFA (I) commander-in-chief (C-in-C) Paresh Baruah para statement te janaishe. Etu pithor manuh khan para fesla lowa toh hoile, olop din akhe te Assam Chief Minister Himanta Biswa Sarma para ULFA (I) chief Paresh Baruah logot bantok neji korikena kotha koriboli koikena thaka beche ase koishe. “ULFA logot kotha koriboli toh tuita(2) rastha ase. Paresh Baruah toh akhe ahiboli laki, etu nehiana ami khan tai logot jaboli laki. Jodi tuita(2) side para be monjur ase koile, kotha kora te besi dukh nathakibo,” koikena Sarma para janaishe. Baruah para koishe ke, konuba Indian security forces laga officials aro Assam police khan para ULFA (I) laga nam toh beya korikena putnam koriboli kojus kori ase. Friday din Tinsukia district, Digboi police station pithor Tingrai Bazar te grenade blast te tui(2) jun manuh morishe. Hoilebi, etu laga kam toh ULFA (I) khan para nahoi koishe, police officials khan para ULFA (I) laga kam ase koikena suspect te ase koishe.