ULFA-I para Quippo employees ke jarishe

DIBRUGARH: Saturday din te United Liberation Front of Asom-Independent (ULFA-I) khan para Arunachal Pradesh laga Lumibasti Nampong, Changlang district pithor te Quippo Oil aro Gas Infrastructure Limited te kam kora manuh tui(2) jun ke thurikena thaka toh jarishe koishe. Etu tui(2) jun ke ULFA-I para thurikena 115 din thaka beche April 3 darik 12.20 pm samai jarishe koishe. Radio operator Ram Kumar (35) umer, Bihar manuh aro drilling superintendent Pranab Kumar Gogoi (51) umer, Assam laga Sivasagar district, etu tui(2) jun ke ULFA-I aro NSCN militants khan para December 21 darik te thurishe, etu samai tai jun toh Arunachal Pradesh laga Changlang district te Kumchaika drilling jaga te kam kori thaka samai thurikena jaishe. Khobor hesab te, April 1 darik te Pranab Kumar Gogoi aro Ram Kumar para ghor manuh logot Satellite phone te kotha koishe. Khobor para koishe, ULFA-I camp te moina oper thurikena thaka nemite tai jun laga halat toh kumjur hoishe. ULFA-I para oil company headquartered New Delhi, Quippo Oil aro Gas Infrastructure Limited logot tai jun ke jariboli February 16 daik toh deadline koikena thakishe. ULFA-I khan para tai jun ke jariboli nemite Rs 20 crore mangkishe, hoilebi company para etu poisa toh thishe naa nai khobor toh clear thaka nai koishe. Ram Kumar laga ghor manuh khan Bihar para journey toh soruh hoikena Sunday din Assam pongchishe. Etu samai, Changlang Deputy Commissioner Devansh Yadav para koishe ke, Pranab Kumar Gogoi ke paishe aro Ram Kumar ke aro bapoli ase. “media hesab te Ram Kumar ke jarishe, hoilebi itya dak ami khan hath te aro poncha-nai,” koikena Yadav para janaishe. Changlang district Superintendent of Police Mihin Gambo para koishe ke, Pranab Kumar Gogoi ke Longvi bosti, Nampong police station pithor para 2 pm samai othaishe. “legal formalities aro medical checkup beche te, tai laga ghor manuh hath te thiboli ase,” tai koishe, etu oper te Ram Kumar ke toh aro othaboli ase.