Guwahati, October 31 : Union Minister Kiren Rijiju para October 31 te, Congress party ke taikhan para 60 years India ke chola homoitey Northeast ke neglect kora nimitey taikhan laga khilaf te awas uthaisey. Northeast laga manu khan ke simple aro bisi bhak gumrah hoija manu asey koikina etu Union Minister para koisey ki Northeast laga manu khan tu emotional asey hoilebi etya misguided nathaka hoisey aro taikhan para Rahul Gandhi aro Congress party ke Congress para rule kuri thaka homoitey Northeast laga manu khan ke ki nimitey protection diyanai, ki nimitey etu jaga ke pura puri neglect kuridisey aro taikhan laga rights ke kile cholabole diyanai etu sawal hudibole koisey.
Rijiju para reporter khan ke Mizoram Assembly election ahibole ageyte BJP Manifesto (jitisey koiley ki ki kuribo etu likhikina thaka) release kora laga kotha koi thaka homoitey Prime Minister Narendra Modi para policies(nyom khan) ola laga tarif kurikina koisey ki Northeast tu khali BJP laga under te hey kamyabi dikhibole paribo aro desh laga baki rajya khan logotey agey baribole paribo.
Tai para enaka koisey, “Amikhan laga document para etu safa koidisey ki amikhan para Mizo manu khan laga jibon tu kinaka kurikina bodli kuridibole mon asey. Sob ghor nimitey khabole thik thak thaka pani, proper bijli, busti khan te bhal rasta, highway, airport, railway, skill development, health facility, pora likha laga facility etu khan sob tu manu khan para pai thaka jaruri scheme aro subidha khan asey. Ami para kunba kisan khan ke hudisey. Taikhan para Kisan Samman Yojana laga under te manu khan para paikina thaka jaruri scheme aro subidha khan asey. Jawan manu khan Prime Minister Modiji para launch kora program khan laga under te skill laga training pai asey.”
Aro koisey ki Mizoram laga sarkar te BJP laga jarurat asey taki taikhan para policies(nyom) khan implement kora te 100% successful hobo paribo.
Mizoram te November 7 te election hobole asey.
Add Comment