UP laga 19 districts te notun Covid cases nai

New Delhi: Uttar Pradesh te jowa 24 gonda samai, komti hoilebi 19 districts te ekta notun Covid cases be nai koishe. Official bulletin khobor hesab te, state te 7,221 active cases thaka pithor te 4,500 manuh neshina khan ghor te isolation te bohi ase. Lucknow ekla te 415 active cases aro baki dosura districts te active cases toh 300 logot komti te ase. Mahoba, Hamirpur aro Kaushambhi districts toh itya free coronavirus hoikena zero active cases te ase. 66 districts neshina te notun cases toh 10 cases logot komti wala ase. Etu samai state laga alag-alag jaga te 340 notun cases khobor paishe. Itya state te 1,104 bemar manuh bhal hoishe aro sob melaikena bhal howa rate toh 98.3 per cent te ase. Additional Chief Secretary (Information) Navneet Sehgal para koishe ke, “itya samai dosura states te toh hazar cases neshina thuri thaka te, UP te toh bemari cases toh komti koriboli pari ase. Hoilebi, cases komti hoi ase koikena manuh khan para bemari samai besi hoshari thakiboli lage,” koikena tai para manuh khan logot janaishe. 19 districts, neshina-  Sonbhadra, Jhansi, Ayodhya, Etah, Baghpat, Etawah, Basti, Aurraiya, Badaun, Bhadohi, Kannauj, Lalitpur, Firozabad, Kasganj, Banda, Chitrakoot, Mahoba, Hamirpur aro Kaushambhi te notun bemari cases ekta be khobor nai. Hoilebi, 24 gonda pithor te bemar para 57 manuh morishe, etu melaikena itya dak state te 21,914 manuh morikena ase.