September 19, 2020. Chinese apps TikTok aro WeChat, toh United States te September 20 (Sunday) din para bondh koribo,koikena AFP para junai thishe. Etu tuita(2) Chinese apps ban koriboli fesla kora toh India para be TikTok aro 200 oper dosura Chinese apps security nemite banned kori thishe. Etu apps laga malik toh ByteDance ase, TikTok para US tech giant Microsoft aro Oracle logot US te jolaboli nemite bekabo kotha thakishe aro etu samay Trump laga administration para company logot kotha toh sign koriboli 45 din thishe, etu nemite United States te banned koriboli ase koishe. Khobor para koishe ke, TikTok para US administration ke security nemite fesla koriboli kotha toh submitted korishe aro olop din pithor te khobor toh janibo. Cloud major Oracle para olop din agae te koishe ke, etu kotha toh ByteDance para US Treasury Department logot proposal submitted kora ase. Oracle jarikena, Walmart be etu notun global TikTok te shamil ase koikena CNBC para khobor thishe. Etu samay, Microsoft para TikTok toh US te jolabo nemite keniboli kori thaka toh Sunday din te ByteDance para tai khan laga proposal toh rejected korishe. Etu same din te Walmart para koishe ke, tai khan TikTok te interest ase etu nemite ByteDance aro dosura parties khan logot kotha koribo koishe.
Add Comment